AQSH prezidenti Donald Tramp Ikkinchi jahon urushidagi g‘alabaga AQSH sababli erishilganini ma’lum qildi. Bu haqda u 8-mayni G‘alaba kuni deb e’lon qilgan hujjatni imzolash marosimida aytib o‘tdi.
Butun dunyoda Ikkinchi jahon urushidagi ittifoqchilar bu hafta bayram qilishmoqda, ammo AQSH bu kunni hech qachon chinakamiga nishonlamagan, garchi g‘alaba asosan biz tufayli qo‘lga kiritilgan bo‘lsa-da. Xohlaysizmi-yo‘qmi, biz bu urushga kirdik va uni yutib chiqdik. Bizga ko‘plab buyuk ittifoqchilar yordam berdi, biroq o‘ylaymanki, hech kim aynan biz ustun kuch bo‘lganimizni inkor etmaydi, dedi Tramp.
Oq uy saytidagi hujjatga ko‘ra, shu kuni Amerika xalqi “o‘z vatani, erkinligi va G‘arb sivilizatsiyasining omon qolishi uchun” halok bo‘lganlarning barchasini xotirlaydi.
Amerika askarlarining qurbonlarisiz bu urushda g‘alaba qozonib bo‘lmas edi va bugungi dunyo butunlay boshqacha ko‘rinishda bo‘lardi, deyiladi hujjatda.
AQSH prezidenti 8-mayni Ikkinchi jahon urushida qozonilgan G‘alaba kuni va 11-noyabrni Birinchi jahon urushida qozonilgan G‘alaba kuni deb e’lon qilgandi. U Amerikaning ko‘plab ittifoqchilari allaqachon 8-mayni nishonlayotganini, biroq aynan AQSH g‘alabani ta’minlash uchun “boshqa har qanday davlatdan ko‘proq” ish qilganini aytgandi.
Biz ikkala urushda ham g‘alaba qozondik. Kuch-qudratda, jasoratda, harbiy mahoratda bizga hech kim yaqin bo‘lmagan, degan u.
Tramp yanvar oyida Rossiya AQSHga Ikkinchi jahon urushida g‘alaba qozonishda yordam berganini aytgandi.
Izoh (0)