Qirg‘iziston futbol ittifoqi Shimoliy Koreya futbol federatsiyasiga JCH-2026 saralash bosqichi doirasidagi 5-iyun kuniga belgilangan o‘yinni Toshkentda o‘tkazishni taklif qildi. Bu haqda FIFA tashkiliy qo‘mitasi a’zosi Alisher Nikimbayev xabar berdi.
Ushbu o‘yinda rasmiy maydon egasi Shimoliy Koreya terma jamoasi hisoblanadi. Biroq ular siyosiy vaziyatlar sabab o‘z mamlakatida uchrashuvlar o‘tkaza olmaydi va shu sababli o‘yin Shimoliy Koreya futbol federatsiyasi tanlagan istalgan Osiyo davlatida bo‘lishi mumkin.
Qirg‘iziston tomonning fikricha, Shimoliy Koreya 10-tur uchrashuvini Tehronda o‘tkazishi kerakligi inobatga olinsa, Qirg‘izistonga qarshi o‘yin uchun Toshkentni tanlash mantiqan to‘g‘ri qaror bo‘ladi.
Hozirda Qirg‘iziston terma jamoasi A guruhida 6 ochko bilan 5-o‘rinda ketmoqda va ularda saralashning 3-bosqichiga yo‘llanma olish uchun imkoniyat saqlanib qolgan. Shimoliy Koreya esa 2 ochko bilan so‘nggi o‘rinni egallab turibdi.
Ma’lumot uchun. O‘zbekiston milliy jamoasi 5-iyun kuni BAA maydonida mehmon bo‘lsa, 10-iyun kuni Toshkentda Qatar bilan to‘qnash keladi.
Izoh (0)