AQSHning Florida shtatidagi universitetda yuz bergan otishma oqibatida ikki kishi halok bo‘ldi. Bu haqda BBC xabar berdi.
Hodisa 17-aprel kuni Tallaxassi shahridagi Florida shtati universiteti kampusida yuz bergan. Otishmani universitetning 20 yoshli talabasi sodir etgan. U politsiyada 18 yil xizmat qilgan sherif o‘rinbosari Jessika Ayknerning o‘g‘li hisoblanadi.
Afsuski, u (onasi)ga tegishli qurolga ega bo‘lgan, bu qurol jinoyat joyida topildi, dedi Leon okrugi sherifi Uolt Maknil.
Uning so‘zlariga ko‘ra, gumonlanuvchi uzoq vaqt davomida Lion okrugi sherifi idorasi qoshidagi Yoshlar maslahat kengashi a’zosi bo‘lgan.
Uning qo‘lida qurol borligi biz uchun kutilmagan hol bo‘lmadi, dedi sherif.
Rasmiy ma’lumotlarga ko‘ra, halok bo‘lganlar universitet talabalari emas. Ular haqida boshqa tafsilotlar hozircha noma’lum. Ta’lim muassasasi rahbariyati darslar va sport tadbirlarini vaqtincha to‘xtatgan.
Hujum qilgan shaxs politsiya bilan otishmada yaralangan va shifoxonada. Uning ahvoli haqida ham ma’lumot yo‘q. Amerika OAVlariga ko‘ra, politsiya uni hibsga olish chog‘ida u buyruqlarga bo‘ysunmagan, so‘ngra esa huquq-tartibot idoralari bilan muloqot qilishdan bosh tortgan.
Oq uyda Italiya bosh vaziri Jorja Meloni bilan uchrashuv chog‘ida AQSH prezidenti Donald Tramp uni voqea haqida xabardor qilishganini aytdi.
Tramp jurnalistlarning “Ushbu otishmadan so‘ng qurol muomalasiga oid qoidalarni o‘zgartirish niyatingiz yo‘qmi?” degan savoliga javoban shunday dedi:
Men Ikkinchi tuzatish (ya’ni, qurol saqlash huquqi) tarafdoriman. Men boshidanoq shu fikrda bo‘lganman. Qurol emas, odam otadi, degan u va bu hodisani sharmandalik deb atagan.
Izoh (0)