Floridadagi otishmada uch nafar afroamerikalik halok bo‘lganidan keyin AQSH prezidenti Jo Bayden “oq tanlilar ustunligi” haqidagi irqchilik g‘oyasini yo‘q qilishga chaqirdi. Amerika yetakchisining bayonoti Oq uy saytida chop etildi.
26-avgust, shanba kuni Jeksonvill shahrida oq tanli erkak qora tanlilar uchun universitet yaqinidagi do‘konda o‘t ochib, uch nafar afroamerikalikni o‘ldirgan. Baydenning so‘zlariga ko‘ra, huquq-tartibot idoralari voqeani nafratga asoslangan jinoyat va ekstremistik harakat deb taxmin qilmoqda.
“Savollarga javob izlashda davom etar ekanmiz, Amerikada oq tanlilar ustunligiga o‘rin yo‘qligini aniq va qatʼiy aytishimiz kerak. Do‘konga boradigan qora tanli oilalar yoki maktabga ketayotgan qora tanli o‘quvchilar terisining rangi tufayli o‘q uzilishidan qo‘rqib yashaydigan mamlakatda yashashga chek qo‘yishimiz kerak. Bu yer nafrat makoni bo‘lmasligi kerak”, — dedi Bayden.
Kolorado universiteti olimlari tomonidan o‘tkazilgan tadqiqotga ko‘ra, 2014-yilning 1-yanvaridan 2022-yilning 31-dekabriga qadar Qo‘shma Shtatlarda 4 011 ta ommaviy otishma sodir bo‘lgan. Ko‘pincha ular mamlakat janubi-sharqida va o‘qotar qurol savdosi kuchaytirilgan Illinoys shtatida kuzatilgan.
Statista kompaniyasi ma’lumotlariga ko‘ra, 1982-yildan 2023-yil iyuliga qadar AQSHdagi 145 ta ommaviy otishmaning 76 tasi oq tanlilar tomonidan sodir etilgan (52 foiz), 26 tasi afroamerikaliklar (18 foiz), 12 tasi Lotin Amerikasiga mansub kishilar (8 foiz) hissasiga to‘g‘ri keladi.
Izoh (0)