AQSHning Men shtati, Lyuiston shahrida sodir bo‘lgan ommaviy otishmada 22 kishi halok bo‘ldi, yana 60 kishi yaralandi. Bu haqda CNN va ABC News telekanallari huquq-tartibot idoralaridagi manbalarga tayanib, xabar berdi.
“Diqqat: Lyuiston shahrida faol otishma holati mavjud. Huquq-tartibot idoralari odamlardan boshpanalarga borishni so‘raydi. Iltimos, uyingiz eshiklarini qulflab o‘tiring”, — deyiladi Men shtati politsiyasining Facebook’dagi ogohlantirish postida.
Androskoggin okrugi sherifi gumonlanuvchi sifatida qo‘lida avtomat tutgan oq tanli erkakning suratini e’lon qildi. “Gumonlanuvchi hamon ozodlikda”, — deyiladi xabarda.
ABC telekanali xabariga ko‘ra, noma’lum shaxs mahalliy bar va Walmart supermarketi markazida o‘t ochgan. Uni qidirishda FQB vertolyotlari ishtirok etmoqda.
Keyinchalik Fox News aniqlik kiritishicha, bar va Walmart markazidan tashqari uchinchi joyda otishma sodir etilgan. Sun Journal’ning yozishicha, ehtimoliy gumonlanuvchining shaxsi allaqachon aniqlangan. U 40 yoshli Robert Kard bo‘lib chiqdi. U harbiy tajribaga ega va o‘qotar qurollar bo‘yicha instruktor ekani aytilmoqda. Aniqlik kiritilishicha, erkakning ruhiy salomatligi bilan bog‘liq muammolar bo‘lgan.
Oq uy matbuot kotibining NBC telekanaliga aytishicha, prezident Jo Bayden voqea yuzasidan allaqachon xabardor qilingan.
Lyuiston Portlenddan taxminan 57 kilometr shimolda joylashgan va Men shtatidagi ikkinchi yirik shahardir. Shahar aholisi taxminan 37 ming kishini tashkil qiladi.
Izoh (0)