АҚШнинг Флорида штатидаги университетда юз берган отишма оқибатида икки киши ҳалок бўлди. Бу ҳақда BBC хабар берди.
Ҳодиса 17 апрель куни Таллахасси шаҳридаги Флорида штати университети кампусида юз берган. Отишмани университетнинг 20 ёшли талабаси содир этган. У полицияда 18 йил хизмат қилган шериф ўринбосари Жессика Айкнернинг ўғли ҳисобланади.
Афсуски, у (онаси)га тегишли қуролга эга бўлган, бу қурол жиноят жойида топилди, деди Леон округи шерифи Уолт Макнил.
Унинг сўзларига кўра, гумонланувчи узоқ вақт давомида Лион округи шерифи идораси қошидаги Ёшлар маслаҳат кенгаши аъзоси бўлган.
Унинг қўлида қурол борлиги биз учун кутилмаган ҳол бўлмади, деди шериф.
Расмий маълумотларга кўра, ҳалок бўлганлар университет талабалари эмас. Улар ҳақида бошқа тафсилотлар ҳозирча номаълум. Таълим муассасаси раҳбарияти дарслар ва спорт тадбирларини вақтинча тўхтатган.
Ҳужум қилган шахс полиция билан отишмада яраланган ва шифохонада. Унинг аҳволи ҳақида ҳам маълумот йўқ. Америка ОАВларига кўра, полиция уни ҳибсга олиш чоғида у буйруқларга бўйсунмаган, сўнгра эса ҳуқуқ-тартибот идоралари билан мулоқот қилишдан бош тортган.
Оқ уйда Италия бош вазири Жоржа Мелони билан учрашув чоғида АҚШ президенти Дональд Трамп уни воқеа ҳақида хабардор қилишганини айтди.
Трамп журналистларнинг “Ушбу отишмадан сўнг қурол муомаласига оид қоидаларни ўзгартириш ниятингиз йўқми?” деган саволига жавобан шундай деди:
Мен Иккинчи тузатиш (яъни, қурол сақлаш ҳуқуқи) тарафдориман. Мен бошиданоқ шу фикрда бўлганман. Қурол эмас, одам отади, деган у ва бу ҳодисани шармандалик деб атаган.
Изоҳ (0)