AQSHning Alabama shtati Dedevil shahridagi tug‘ilgan kun kechasida sodir bo‘lgan otishmada to‘rt kishi halok bo‘ldi. O‘smirlar sinfdoshining 16 yoshini nishonlayotgan edi. Voqeadan bir kun o‘tganiga qaramay, hujumchi haqida ma’lumotlar oshkor qilinmayapti.
Otishmada jami 28 kishi jarohatlangan, ba’zilarining ahvoli og‘ir.
AQSH prezidenti Jo Bayden yana bir bor qurol qonunchiligini kuchaytirishga chaqirdi. “Qurol Amerikadagi bolalar qotillari orasida birinchi o‘rinda turadi va bu raqamlar kamayish o‘rniga faqat ortib bormoqda”, — dedi Bayden Oq uy veb-saytida e’lon qilgan bayonotida.
“Bolalar qo‘rquv sabab tug‘ilgan kunga ham bora olmasa, mamlakatimiz qanday darajaga kelib qoldi?”, — qo‘shimcha qildi u.
Dadevil — taxminan 3 200 ga yaqin odam yashaydigan shaharcha, u yerda ilgari bunday yirik otishmalar kuzatilmagan.
Hodisani sodir etganlar haqida hozircha ko‘p narsa ma’lum emas. Reuters xabariga ko‘ra, mahalliy hukumat voqea tafsilotlarini oshkor etmayapti.
Hujumchining o‘t ochishdan maqsadi, uning hibsga olingan-olinmagani noma’lum. Otishma qanday to‘xtatilgani, gumonlanuvchining o‘zi tirik yoki yo‘qligi haqida ham deyarli hech qanday ma’lumot berilmagan.
Shtat politsiyasi vakilining aytishicha, tergov “uzoq va murakkab jarayon” bo‘ladi. Otishmada jarohat olganlarning ahvoli “o‘ta og‘ir” dan yengilgacha.
Aftidan, qurbonlarning aksariyati o‘smirlar bo‘lgan. Jumaladan, Fil Daudell ismli o‘smirning buvisi OAVga nabirasi halok bo‘lganini aytgan. U o‘rta maktabni tugatib, Amerika futboli o‘yinchisi sifatida Jeksonvil universitetiga stipendiya asosida o‘qishga ketmoqchi edi.
Alabama — fuqarolarning qurolga egalik qilish huquqini himoya qilish bilan tanilgan shtat. Respublikachi gubernator Kay Iveyning hamdardlik xabari ijtimoiy tarmoqlarda qurol qonunchiligini isloh qiluvchilarning tanqidiga sabab bo‘ldi.
Izoh (0)