AQSH sobiq prezidenti Donald Tramp Tennessi shtatining Neshvill shahridagi maktabda yuz bergan otishmadan keyin o‘qituvchilarni qurollantirishni taklif qildi. Bu haqda u Indianadagi forumda aytdi.
“Agar o‘qituvchilarning kamida 5 foizi o‘z ixtiyori bilan qurollansa va jinoyatchilarga qarshilik ko‘rsatish uchun qurol ishlatishni o‘rgansa, (maktabdagi otishmalar) muammosi barham topadi”, — dedi Tramp.
“Modomiki Ukrainaga 120 milliard dollar yuborgan ekanmiz, demak buncha mablag‘ning o‘ndan bir qismini amerikalik bolalar va maktablarni himoya qilishga sarflay olamiz”, — deya qo‘shimcha qildi Tramp.
27-mart kuni Neshvilldagi xususiy xristian maktabida otishma sodir bo‘lgan edi, oqibatda olti kishi — uch bola va uch nafar kattalar, jumladan, ta’lim muassasasi ma’muri, o‘qituvchi va vasiy halok bo‘ldi. Otishmani maktabning sobiq o‘quvchisi sodir etgan. Yana yetti kishi og‘ir, 17 kishi yengil tan jarohati oldi.
2018-yilda ham Tramp maktablardagi hujumlarning oldini olish uchun o‘qituvchilarni qurollantirishni taklif qilgandi. O‘sha paytda mamlakat prezidenti bo‘lgan Tramp Floridadagi otishma qurbonlari bilan uchrashuvda AQSHda qurol-yarog‘ muomalasini tartibga solish va tekshirish bilan bog‘liq muammolarni imkon qadar tezroq hal qilishga va’da bergandi.
Izoh (0)