Toshkent shahrida o‘zining jinoiy sheriklari bilan til biriktirgan shaxs mijozlar bilan telefon orqali gaplashib, ularni haj safariga yuborishni maʼlum qilgan. Bu haqda poytaxt IIBB matbuot xizmati izoh berdi.
Maʼlum qilinishicha, u har bir shaxsdan 5,9 ming dollardan, jami 23,6 ming dollar olgan vaqtda ushlandi.
“To‘rt nafar odamni hajga jo‘nataman deb telefonda gaplashdim. Ular bilan ko‘rishdim. Hajga jo‘natish uchun sertifikat qilib berib, 23,6 ming dollar oldim. Men baribir ularni jo‘nata olmasdim. Shu pullarni o‘z manfaatim yo‘lida oldim. Aybimga iqrorman. Bu narsa bilan turfirma yoki biror inson shug‘ullana olmaydi. Faqat davlat jo‘natadi”, deydi gumonlanuvchi.
Mazkur holat yuzasidan unga nisbatan Jinoyat kodeksining 168-moddasi (firibgarlik) bilan jinoyat ishi qo‘zg‘atildi. Tergov davomida fuqaro ayblanuvchi tariqasida jalb qilinib, qamoqqa olish ehtiyot chorasi qo‘llanilgan.
Hozirda tergov ishlari davom etmoqda.
Din ishlari bo‘yicha qo‘mita O‘zbekistonda so‘nggi ikki oyda o‘tkazilgan tekshiruvlarga ko‘ra, umra litsenziyasiga ega bo‘lmasdan ushbu xizmatni ko‘rsatayotgan 31 ta sayyohlik firmasi mas’ullariga nisbatan jinoyat ishi qo‘zg‘atilganini ma’lum qilgandi. Ushbu qo‘mita ham noqonuniy turfirma yoki turagentlardan ogoh bo‘lishga chaqirgandi.
O‘zbekistonda umra tadbirlarini tashkil etish
2024-yil iyulida O‘zbekistonda umra tadbirlarini tashkil etish va o‘tkazish litsenziyalanadigan faoliyatning alohida turi sifatida belgilandi. Hukumat qarori bilan quyidagi litsenziya talab va shartlari joriy etilgan. Litsenziyaga ega bo‘lmagan tadbirkorlik subyektlari tomonidan umra xizmatlarini ko‘rsatganlik uchun yuridik shaxslarga solinadigan jarimalar miqdorlari BHMning 200 baravari (75 million so‘m) etib belgilangan.
Izoh (0)