Ijtimoiy tarmoqlarda Toshkent xalqaro aeroportida Saudiya Arabistoniga ziyorat turlarini tashkil etuvchi turistik kompaniyalar uchun cheklovlar joriy etilgani haqida videolar tarqaldi. Uzbekistan Airports buni rad etdi.
“Toshkent aeroporti va Uzbekistan Airports boshqaruv kompaniyasi tomonidan turistik firmalar va yo‘lovchilarga nisbatan hech qanday cheklovlar kiritilmagan”, deyiladi kompaniya xabarida.
Ta’kidlanishicha, aviachiptaga ega barcha yo‘lovchilar tegishli reyslarga o‘z vaqtida ro‘yxatdan o‘tkazilgan. Hozirgacha Saudiya Arabistoniga amalga oshirilayotgan ikki reys bo‘yicha ro‘yxatdan o‘tish jarayoni yakunlandi:
- Flyadeal aviakompaniyasining Toshkent—Jidda yo‘nalishi bo‘yicha F39223 reysi: 352 yo‘lovchi, rejalashtirilgan jo’nash vaqti 19-fevral soat 00:10
- Centrum Air aviakompaniyasining Toshkent—Jidda yo‘nalishi bo‘yicha C6 319 reysi: 176 yo‘lovchi, rejalashtirilgan jo‘nash vaqti 19-fevral soat 00:20.
Bundan avval ijtimoiy tarmoqlarda umra va hajga boruvchilarga meningitga qarshi emlanish talabi bekor qilingani haqida xabarlar tarqalgandi. Sanepidqo‘mita bu xabarlar haqiqatga to‘g‘ri kelmasligini, Saudiya Arabistoni umra va haj ziyoratlariga boruvchilarda meningit kasalligiga qarshi emlanganlik haqida hujjat bo‘lishi zarurligini rasman bekor qilmaganini ma’lum qilgandi.
Izoh (0)