AOKAda Din ishlari bo‘yicha qo‘mita axborot xizmati rahbari Ilhom Maʼrupov ishtirokida o‘tkazilgan brifingda maʼlumot berildi.
Unga ko'ra, 2024-yilda diniy-maʼrifiy sohada salmoqli ishlar amalga oshirildi. Xususan, Din ishlari bo‘yicha qo‘mita tomonidan Davlat dasturida belgilangan vazifalar, shuningdek sohaga doir ishlab chiqilgan yillik reja va dasturlar ijrosi to‘liq bajarildi.
O‘tgan yilning 15-16-oktyabr kunlari Toshkent va Xiva shaharlarida “Islom – tinchlik va ezgulik dini” mavzusida xalqaro ilmiy-amaliy konferensiya tashkil etildi. Anjumanda O‘zbekiston va 22 ta xorijiy davlatdan 200 nafardan ortiq diniy soha xodimlari ishtirok etdi. 16-noyabr – Xalqaro bag‘rikenglik kuniga bag‘ishlab 11-16-noyabr kunlari Toshkent shahrida va respublikaning barcha hududlarida Bag‘rikenglik haftaligi doirasida bir qator madaniy-maʼrifiy va ilmiy-amaliy tadbirlar yuqori saviyada tashkil etildi.
Haftalik doirasida 132 nafar davlat va jamoat tashkilotlari xodimlari “Diniy bag‘rikenglik” ko‘krak nishoni bilan taqdirlandi. Shuningdek, mutasaddi vazirlik va idoralar bilan hamkorlikda ijtimoiy-maʼnaviy muhit barqarorligini mustahkamlashga qaratilgan tizimli ishlar amalga oshirildi.
Tizim tashkilotlari bilan hamkorlikda mutaassiblik, radikal g‘oyalar va ekstremizm ruhidagi axborotlarga qarshi 10 171 ta (4 664 ta video, 3 954 ta maqola, 900 ta audio, 653 ta infografika) raddiya mazmunidagi materiallar tayyorlanib, tarqatildi.
Malaka oshirish markazi va uning filiallarida 2 676 nafar davlat va jamoat tashkilotlari rahbar-xodimlarining malakasi oshirildi.
Bugungi kunda respublika bo‘yicha 2 145 ta masjid faoliyat yuritmoqda, 2024-yilda 14 ta yangi masjid davlat ro‘yxatidan o‘tkazildi, 64 ta masjidda tubdan qayta qurish hamda 17 ta masjidda taʼmirlash ishlari yakunlandi.
Ayni paytda respublikada 198 ta noislomiy diniy tashkilot faoliyat yuritmoqda. 2024-yilda Jizzax viloyatida 1 ta yangi diniy tashkilot – Yevangel xristianlari cherkovi davlat ro‘yxatidan o‘tkazildi. Hisobot davrida Din ishlari bo‘yicha qo‘mita hamda tizim tashkilotlari vakillari, o‘zbekistonlik islomshunos olimlar va tadqiqotchilarning 486 ta diniy-maʼrifiy sohaga oid xalqaro tadbirlardagi ishtiroki taʼminlandi.
Din ishlari bo‘yicha qo‘mita rahbariyatining 12 ta xorijiy hamkorlar bilan qator uchrashuvlari tashkil qilindi. Ularda respublikamizda diniy-maʼrifiy sohada amalga oshirilayotgan o‘zgarish va islohotlar hamda o‘zaro hamkorlik masalalari yuzasidan fikr almashildi.
2024-yilgi haj mavsumi va umra ziyorati yuqori saviyada tashkil etildi. Xususan, 15 150 nafar ziyoratchi Haj amalini bajardi. 2024-yilda Qo‘mitaga kelib tushgan 1 477 ta murojaatdan 1 108 tasiga huquqiy maʼlumot berildi, 298 tasi ijobiy hal qilindi, 36 tasi (diniy tashkilotni davlat ro‘yxatidan o‘tkazish uchun hujjatlarda ko‘rsatilgan kamchiliklar sabab) rad etildi, 19 ta murojaat tegishliligi bo‘yicha vakolatli davlat organlariga yo‘naltirildi.
Joriy yildagi ramazon oyiga tayyorgarlik ko‘rish hamda munosib o‘tkazish yuzasidan tegishli ishlar amalga oshirildi. 2025-yil 6 va 10-fevral kunlari O‘zbekiston va Kavkaz musulmonlari idoralari, Qozog‘iston va Qirg‘iziston musulmonlari diniy boshqarmalari, Turkiyaning Diyonat boshqarmasi Fatvo hayʼatlari masʼullari hamda Turkiy davlatlar tashkiloti vakili ishtirokida onlayn yig‘ilishlar tashkil etildi.
Yig‘ilishlarda 2025-yilda ramazon oyining boshlanishi va Ramazon hayitining birinchi kunini aniqlash masalalari muhokama qilindi. Fatvo hayʼatlari aʼzolari ramazon oyining birinchi kuni 1-mart, shanba kuniga to‘g‘ri kelishi bo‘yicha bir ovozdan yakdil xulosa qildi. Joriy Ramazon oyida mamlakatda faoliyat yuritayotgan 2145 ta masjiddan 1 743 tasida xatmi Qurʼon tadbirlarini o‘tkazish rejalashtirilmoqda.
O‘zbekistonda ramazon oyi 1-mart, shanba kuni boshlanadi. Prezident qaroriga ko‘ra, ushbu oyda ehtiyojmandlar hamda ilm-maʼrifat yo‘lida izlanayotgan yoshlarga yordam berish bo‘yicha tashabbuslarni qo‘llab-quvvatlashga, atrof-muhitni asrash, muqaddas qadamjo, ziyoratgoh va qabristonlarni obodonlashtirish, ko‘chatlar ekishga hamda ramazon oyi bilan bog‘liq tadbirlarda me’yorga amal qilish va isrofgarchilikka yo‘l qo‘ymaslikka alohida eʼtibor beriladi.
O‘zbekiston musulmonlari idorasi 28-fevraldan hududlarda tarovih namozining boshlanish vaqtlarini eʼlon qildi.
Izoh (0)