Toshkentda o‘tkazilgan tezkor tadbirda soxta sayyohlik firmalari faoliyatiga chek qo‘yildi. Bu haqda poytaxt IIBB matbuot xizmati xabar berdi.
Maʼlum qilinishicha, Uchtepa tumanidagi “Mahdiy turizm” MCHJ xodimi – 1995-yilda tug‘ilgan A.J. 4 nafar fuqaroga haj safariga yuborishni vaʼda qilgan. U MCHJning ushbu faoliyat turi bilan shug‘ullanishga litsenziyasi yo‘qligini bila turib, 27,2 ming dollarni olayotgan vaqtda qo‘lga olingan.
Shuningdek, Shayxontohur tumanidagi “Sohil turizm” MCHJ direktori – 1991-yilda tug‘ilgan S.N. 2 nafar fuqaroning ishonchiga kirib, ularni haj safariga yuborishni vaʼda qilgan. Unda ham litsenziyasi bo‘lmasa-da, 10 ming dollar olgan vaqtida xolislar ishtirokida ushlangan.
Mazkur holatlar yuzasidan to‘plangan hujjatlar Iqtisodiy jinoyatlarga qarshi kurashish departamentiga taqdim etildi.
O‘zbekistonda ikki firma: Panorama Airways va Gulbakhor Airways umra ziyoratchilariga 25 mlrd so‘mlik zarar yetkazgani haqida xabar berilgan edi.
Din ishlari bo‘yicha qo‘mita O‘zbekistonda so‘nggi ikki oyda o‘tkazilgan tekshiruvlarga ko‘ra, umra litsenziyasiga ega bo‘lmasdan ushbu xizmatni ko‘rsatayotgan 31 ta sayyohlik firmasi mas’ullariga nisbatan jinoyat ishi qo‘zg‘atilganini ma’lum qilgandi. Ushbu qo‘mita ham noqonuniy turfirma yoki turagentlardan ogoh bo‘lishga chaqirgandi.
O‘zbekistonda umra tadbirlarini tashkil etish
2024-yil iyulida O‘zbekistonda umra tadbirlarini tashkil etish va o‘tkazish litsenziyalanadigan faoliyatning alohida turi sifatida belgilandi. Hukumat qarori bilan quyidagi litsenziya talab va shartlari joriy etilgan. Litsenziyaga ega bo‘lmagan tadbirkorlik subyektlari tomonidan umra xizmatlarini ko‘rsatganlik uchun yuridik shaxslarga solinadigan jarimalar miqdorlari BHMning 200 baravari (75 million so‘m) etib belgilangan.
Izoh (0)