Тошкент шаҳрида ўзининг жиноий шериклари билан тил бириктирган шахс мижозлар билан телефон орқали гаплашиб, уларни ҳаж сафарига юборишни маълум қилган. Бу ҳақда пойтахт ИИББ матбуот хизмати изоҳ берди.
Маълум қилинишича, у ҳар бир шахсдан 5,9 минг доллардан, жами 23,6 минг доллар олган вақтда ушланди.
“Тўрт нафар одамни ҳажга жўнатаман деб телефонда гаплашдим. Улар билан кўришдим. Ҳажга жўнатиш учун сертификат қилиб бериб, 23,6 минг доллар олдим. Мен барибир уларни жўната олмасдим. Шу пулларни ўз манфаатим йўлида олдим. Айбимга иқрорман. Бу нарса билан турфирма ёки бирор инсон шуғуллана олмайди. Фақат давлат жўнатади”, дейди гумонланувчи.
Мазкур ҳолат юзасидан унга нисбатан Жиноят кодексининг 168-моддаси (фирибгарлик) билан жиноят иши қўзғатилди. Тергов давомида фуқаро айбланувчи тариқасида жалб қилиниб, қамоққа олиш эҳтиёт чораси қўлланилган.
Ҳозирда тергов ишлари давом этмоқда.
Дин ишлари бўйича қўмита Ўзбекистонда сўнгги икки ойда ўтказилган текширувларга кўра, умра лицензиясига эга бўлмасдан ушбу хизматни кўрсатаётган 31 та сайёҳлик фирмаси масъулларига нисбатан жиноят иши қўзғатилганини маълум қилганди. Ушбу қўмита ҳам ноқонуний турфирма ёки турагентлардан огоҳ бўлишга чақирганди.
Ўзбекистонда умра тадбирларини ташкил этиш
2024 йил июлида Ўзбекистонда умра тадбирларини ташкил этиш ва ўтказиш лицензияланадиган фаолиятнинг алоҳида тури сифатида белгиланди. Ҳукумат қарори билан қуйидаги лицензия талаб ва шартлари жорий этилган. Лицензияга эга бўлмаган тадбиркорлик субъектлари томонидан умра хизматларини кўрсатганлик учун юридик шахсларга солинадиган жарималар миқдорлари БҲМнинг 200 баравари (75 миллион сўм) этиб белгиланган.
Изоҳ (0)