O‘zbekistonda ikki firma: Panorama Airways va Gulbakhor Airways umra ziyoratchilariga 25 mlrd so‘mlik zarar yetkazdi. Bu haqda Raqobat qo‘mitasi xabar berdi.
Qayd etilishicha, Raqobat qo‘mitasi tomonidan bugungi kunda internet va ijtimoiy tarmoqlar orqali umra safarlariga yuborish uchun tegishli litsenziya va ruxsatnomasi mavjud bo‘lmagan turoperatorlarning arzon narxda sotish takliflari asosida reklamalar qilinayotgani kabi holatlar kuzatilmoqda.
Misol uchun, umra ziyoratchilariga katta miqdorda, ya’ni 25 mlrd so‘mlik zararni Panorama Airways va Gulbakhor Airways firmalari yetkazgan bo‘lib, aldanib qolgan jabrlanuvchilar soni 2 558 nafarni tashkil etadi.
Surxondaryo viloyati Bilolbek travel MCHJ Jarqo‘rg‘on tumani filiali xodimi N.J. tegishli ruxsatnomasiz umra ziyoratiga yuborishni va’da qilib, fuqaro M.A.ning 14 mln 900 ming so‘m miqdoridagi pulini aldov yo‘li bilan olgan.
Shuningdek, mazkur MCHJning Boysun tuman filiali mutaxassisi A.S. ham ziyorat uchun fuqaro X.M.ning ishonchiga kirib, 2 200 AQSH dollarini firibgarlik yo‘li bilan qo‘lga kiritgan.
Yuqoridagi holatlarga ko‘ra, huquqni muhofaza qiluvchi organlar tomonidan aldov yo‘li bilan fuqarolar ishonchiga kirib, pullarini o‘zlashtirayotgan, ularning xorijda sarson bo‘lishiga sabab bo‘layotgan sayyohlik firmalari va turoperatorlariga tegishli choralar ko‘rilgan.
Umra tadbirlarini tashkil etish va o‘tkazishga oid xizmatlarni ko‘rsatish bilan bog‘liq turistik faoliyat Vazirlar Mahkamasining 2017-yil 7-iyundagi hamda 2024-yil 12-oktyabrdagi qarorlari asosida amalga oshiriladi.
O‘z navbatida, umra tadbirlarini tashkil etish va o‘tkazishga oid xizmatlarni ko‘rsatishga ruxsat berilgan (litsenziyaga ega) 12 ta turoperatorlar ro‘yxati e’lon qilingan. Tegishli litsenziyaga ega bo‘lmagan subyektlar tomonidan ushbu xizmatlarni ko‘rsatish taqiqlangan.
“Reklama to‘g‘risida”gi qonunning 16-moddasiga muvofiq ishlab chiqarilishi yoki realizatsiya qilinishi qonunda taqiqlangan tovarlarni, shuningdek, ishlab chiqarilishi va (yoki) realizatsiya qilinishi uchun tegishli sertifikatlari va litsenziyalari, majburiy sertifikatlashtirish guvohnomalari yoki maxsus ruxsatnomalari mavjud bo‘lmagan tovarlarni reklama qilish taqiqlangan.
Din ishlari bo‘yicha qo‘mita O‘zbekistonda so‘nggi ikki oyda o‘tkazilgan tekshiruvlarga ko‘ra, umra litsenziyasiga ega bo‘lmasdan ushbu xizmatni ko‘rsatayotgan 31 ta sayyohlik firmasi mas’ullariga nisbatan jinoyat ishi qo‘zg‘atilganini ma’lum qilgandi. Ushbu qo‘mita ham noqonuniy turfirma yoki turagentlardan ogoh bo‘lishga chaqirgandi.
O‘zbekistonda umra tadbirlarini tashkil etish
2024-yil iyulida O‘zbekistonda umra tadbirlarini tashkil etish va o‘tkazish litsenziyalanadigan faoliyatning alohida turi sifatida belgilandi. Hukumat qarori bilan quyidagi litsenziya talab va shartlari joriy etilgan. Litsenziyaga ega bo‘lmagan tadbirkorlik subyektlari tomonidan umra xizmatlarini ko‘rsatganlik uchun yuridik shaxslarga solinadigan jarimalar miqdorlari BHMning 200 baravari (75 million so‘m) etib belgilangan.
Izoh (0)