O‘zbekiston AQSH bilan chegara bojxona postlariga radiatsion portal monitorlar o‘rnatishda hamkorlik qilishi mumkin. Bu haqda Bojxona qo‘mitasi xabar berdi.
Keltirilishicha, Bojxona qo‘mitasida AQSH Energetika Vazirligining Yadroviy kontrabandani aniqlash va oldini olish boshqarmasi (YAKAOB) vakillari bilan ishchi uchrashuv bo‘lib o‘tdi. Uchrashuvda chegara bojxona postlariga radiatsion portal monitorlar o‘rnatish va ularning sozligini ta’minlash bo‘yicha hamkorlik istiqbollari muhokama qilindi.
Hozirda Andijondagi “Do‘stlik” hamda Farg‘onadagi “O‘zbekiston” chegara bojxona postlariga va Bojxona institutiga radiatsion portal monitorlarini o‘rnatish ishlari amalga oshirilmoqda va kelgusi oyda jarayon to‘liq yakunlanadi.
Shu boisdan mehmonlar 8—12-aprel kunlari Toshkent xalqaro aeroporti, “G‘ishtko‘prik”, “Navoiy” va “Farg‘ona” chegara bojxona postlarida bo‘ladi hamda radiatsion portal monitorlarni o‘rnatish jarayonlariga baho beradi.
Bundan avval tashqi ishlar vaziri Baxtiyor Saidov AQSH davlat kotibi Marko Rubio va AQSH prezidentining milliy xavfsizlik bo‘yicha maslahatchisi Maykl Uoltz bilan muloqot o‘tkazgani xabar qilingandi.
Izoh (0)