Tashqi ishlar vaziri Baxtiyor Saidov AQSH davlat kotibi Marko Rubio bilan uchrashuv o‘tkazdi. Bu haqda u o‘z sahifasida yozib qoldirdi.
Suhbat chog‘ida O‘zbekiston va AQSH o‘rtasidagi munosabatlarning hozirgi holati va istiqboldagi yo‘nalishlari yuzasidan har tomonlama fikr almashildi.
Tomonlar siyosiy muloqotni mustahkamlash, savdo-iqtisodiy va investitsiyaviy hamkorlikni yanada kengaytirish, mintaqaviy aloqalarni rivojlantirish, shuningdek, Markaziy Osiyoda xavfsizlik va barqarorlikni ta’minlash bo‘yicha umumiy qarashlarni chuqurlashtirishga e’tibor qaratgan.
Baxtiyor Saidov AQSHning O‘zbekistonda amalga oshirilayotgan islohotlar jarayonini izchil qo‘llab-quvvatlayotganini yuqori baholadi. Strategik sheriklik doirasidagi yuqori darajadagi muloqot va amaliy hamkorlikni davom ettirish orqali ikki tomonlama munosabatlardagi ijobiy dinamikani qo‘llab-quvvatlashga kelishib olingan.
Shuningdek, Baxtiyor Saidov Vashingtonda AQSH prezidentining milliy xavfsizlik bo‘yicha maslahatchisi Maykl Uoltz bilan muloqot o‘tkazdi.
Uchrashuv davomida O‘zbekiston va AQSH o‘rtasidagi strategik sheriklikni yanada chuqurlashtirishga bo‘lgan sodiqlik tasdiqlangan. Muloqot chog‘ida mintaqaviy va xalqaro ahamiyatga ega masalalar yuzasidan fikr almashildi.
Kun tartibidan xavfsizlik sohasidagi hamkorlikni mustahkamlash, iqtisodiy taraqqiyot, mintaqaviy bog‘liqlik va Markaziy Osiyoda barqaror rivojlanishni rag‘batlantirish kabi masalalar o‘rin oldi.
Vazir Baxtiyor Saidov AQSH prezidenti tomonidan O‘zbekistonda amalga oshirilayotgan islohotlar dasturi hamda mintaqada tinchlik va farovonlikni ta’minlashga qaratilgan sa’y-harakatlarga ko‘rsatilayotgan doimiy qo‘llab-quvvatlovni yuksak qadrlashini aytdi.
Shavkat Mirziyoyev 17-mart kuni Amerika Qo‘shma Shtatlari Kongressi aʼzosi, O‘zbekiston bilan hamkorlik bo‘yicha parlament kokusi ishtirokchisi Kerol Miller boshchiligidagi delegatsiyani qabul qilgan edi. Unda O‘zbekiston bilan AQSH o‘rtasidagi strategik sheriklik va ko‘p qirrali hamkorlik munosabatlarini yanada rivojlantirish va kengaytirish masalalari ko‘rib chiqilgan.
Izoh (0)