O‘zbekiston terma jamoasi va “Roma” klubi hujumchisi Eldor Shomurodov rimliklar bilan shartnomasini uzaytirishga rozilik bildirdi. Bu haqda Calciomercato nashri xabar bermoqda.
Manbaga ko‘ra, futbolchi klub bilan amaldagi shartnomani yana bir yilga — 2027-yilgacha uzaytirishga kelishib olgan. E’tiborlisi, Shomurodov Rim klubi tarkibida qolish uchun maoshi kamayishiga rozi bo‘lgan. Maosh miqdori hozircha oshkor etilmagan.
Joriy mavsumda Eldor “Roma” safida barcha musobaqalarda 30 ta o‘yinda maydonga tushib, o‘z hisobiga 6 ta gol va 3 ta golli uzatmani yozdirib qo‘ygan. Uning amaldagi shartnomasi 2026-yil yozigacha mo‘ljallangan. Transfermarkt hujumchining qiymatini 4 million yevroga baholamoqda.
Ma’lumot uchun, futbolchi 2021-yilning yozida “Jenoa”dan 18 million yevro evaziga rimliklar safiga o‘tgan edi. U klubda o‘zini to‘liq namoyon eta olmadi. Shu bois bir qancha vaqt “Spetsiya” va “Kalyari” safida ijara asosida o‘ynadi.
Izoh (0)