Ўзбекистон АҚШ билан чегара божхона постларига радиацион портал мониторлар ўрнатишда ҳамкорлик қилиши мумкин. Бу ҳақда Божхона қўмитаси хабар берди.
Келтирилишича, Божхона қўмитасида АҚШ Энергетика Вазирлигининг Ядровий контрабандани аниқлаш ва олдини олиш бошқармаси (ЯКАОБ) вакиллари билан ишчи учрашув бўлиб ўтди. Учрашувда чегара божхона постларига радиацион портал мониторлар ўрнатиш ва уларнинг созлигини таъминлаш бўйича ҳамкорлик истиқболлари муҳокама қилинди.
Ҳозирда Андижондаги “Дўстлик” ҳамда Фарғонадаги “Ўзбекистон” чегара божхона постларига ва Божхона институтига радиацион портал мониторларини ўрнатиш ишлари амалга оширилмоқда ва келгуси ойда жараён тўлиқ якунланади.
Шу боисдан меҳмонлар 8—12 апрель кунлари Тошкент халқаро аэропорти, “Ғишткўприк”, “Навоий” ва “Фарғона” чегара божхона постларида бўлади ҳамда радиацион портал мониторларни ўрнатиш жараёнларига баҳо беради.
Бундан аввал ташқи ишлар вазири Бахтиёр Саидов АҚШ давлат котиби Марко Рубио ва АҚШ президентининг миллий хавфсизлик бўйича маслаҳатчиси Майкл Уолтз билан мулоқот ўтказгани хабар қилинганди.
Изоҳ (0)