O‘zbekiston rasmiylarining iltimosiga binoan Belgiyada xalqaro tergovga javoban 200 million dollar musodara qilingan. Mablag‘larning bir qismi, ya’ni 108 million dollar O‘zbekistonga qaytariladi. Bu haqda Belgiya prokuraturasi xabar berdi.
Gap O‘zbekiston huquq-tartibot idoralari tomonidan korrupsiya va pul yuvish bo‘yicha olib borilayotgan tergov doirasida Belgiyada muzlatib qo‘yilgan mablag‘lar haqida ketmoqda. U telekommunikatsiya shartnomalarini tuzish jarayonida noqonuniy yo‘llar bilan olingan vositachilik pullari hisoblanadi.
Bryussel Qirollik prokurori 28-mart kuni 108 million dollarni Belgiya davlat g‘aznasi hisob raqamiga o‘tkazish to‘g‘risida so‘rov yuborgan. Keyinchalik Bryussel prokuraturasi ushbu mablag‘larni ikki davlat o‘rtasida taqsimlashga qaror qilgan. Bunday usul Yevropa ittifoqiga a’zo davlatlar o‘rtasida musodara qilingan daromadlarni taqsimlashda qo‘llaniladi. Natijada O‘zbekistonga 108 million dollar o‘tkaziladi.
Bu Gulnora Karimovaning pullarimi?
Belgiya prokuraturasi bu mablag‘lar manbasini ochiqlamagan. 2022-yilda adliya vaziri o‘rinbosari Muzraf Ikromov Belgiya qirolligida Gulnora Karimovaga aloqador jinoiy uyushgan guruhga tegishli 240 million AQSH dollarilik aktivlar mavjudligini aytgan edi.
“Gulnora Karimova va u boshchiligidagi jinoiy guruhning noqonuniy o‘zlashtirgan boyliklari umumiy hisobda 1 milliard 400 million AQSH dollariga teng. Bu milliy valyutada 15 trillion so‘m degani. Hisob-kitoblarga ko‘ra, buncha miqdordagi pullarga 1 ming 400 ta maktab qursa bo‘larkan. Masalan, 2020-2021-yillarda Fransiyada jinoiy guruhning ko‘chmas mulklari (2 ta katta qasr) sotilishi natijasida 20 million AQSH dollariga teng pul mablag‘i O‘zbekistonga qaytarildi”, degan edi vazirlik rasmiysi.
Yuqoridagi mablag‘lar Gulnora Karimovaga tegishli yoki tegishli emasligi haqida axborot yo‘q. Adliya vazirligi axborot xizmati ham bu bo‘yicha hozircha ma'lumot yo‘q ekanini bildirdi.
Izoh (0)