O‘zbekiston oliy o‘quv yurtlari va kasb-hunar kollejlarining diplomlari Germaniyada tan olinishiga erishish rejalashtirilmoqda.
Bu masala 1-aprel kuni O‘zbekiston investitsiyalar, sanoat va savdo vaziri o‘rinbosari Shohrux Gulamov Germaniyaning ta’lim va migratsiya sohasi mutaxassislaridan iborat delegatsiya bilan uchrashuvda muhokama qilingan. Muhokama davomida O‘zbekiston OTM va kollejlarini Germaniya Taʼlim vazirligining ANABIN axborot bazasiga kiritilishi ko‘rib chiqilgan.
ANABIN (Anerkennung und Bewertung ausländischer Bildungsnachweise) — Germaniya Ta’lim va tadqiqot vazirligining rasmiy ma’lumotlar bazasi bo‘lib, unda xorijiy diplomlar va ta’lim muassasalarining tan olinishi va baholanishi haqidagi ma’lumotlar bor.
Delegatsiya tarkibida Germaniya hududiy savdo-sanoat palatalarining direktorlari, shuningdek, GP Günter Papenburg AG taʼsischi kompaniyasi tomonidan tashkil etilgan investitsiya kompaniyalari rahbarlari ham bo‘lgan.
Uchrashuvda O‘zbekiston yoshlarini ilg‘or texnologiyalarga o‘rgatish va keyinchalik ularni Germaniya korxonalariga ishga joylashtirishni nazarda tutuvchi qo‘shma loyihalarni amalga oshirish, Germaniyalik mutaxassislarga O‘zbekistonda mehnat faoliyatini amalga oshirish uchun imtiyozlar berish kabi yo‘nalishlar bo‘yicha hamkorlik masalalari ham muhokama qilingan.
2024-yilning sentyabrida o‘zbekistonliklar uchun Germaniyaga migratsiya masalasida bir qator yengilliklar ishlab chiqilayotgani ma’lum qilingandi. O‘sha yili Samarqandda bo‘lib o‘tgan O‘zbekiston—Germaniya oliy darajadagi muzokaralari natijasida bir qator hujjatlar imzolangandi. Ular orasida “Migratsiya va mobillik sohasida har tomonlama sheriklik to‘g‘risida” hukumatlararo bitim ham bor edi.
Izoh (0)