Yelisey saroyida O‘zbekiston prezidenti sharafiga qabul marosimi bo‘lib o‘tdi (foto)

Fransiya prezidenti Emmanuel Makron Yelisey saroyida O‘zbekiston prezidenti Shavkat Mirziyoyev sharafiga davlat qabul marosimini uyushtirdi.

Prezident matbuot xizmatining ma’lum qilishicha, qabulda ikki mamlakat rasmiy delegatsiyalari, Fransiya bosh vaziri Fransua Bayru boshchiligida Vazirlar Mahkamasi a’zolari, taniqli madaniyat, san’at va fan arboblari, ishbilarmon doiralar va jamoatchilik vakillari ishtirok etdi.

Shavkat Mirziyoyev Emmanuel Makron va uning rafiqasi Brijit Makronga qabul uchun minnatdorlik bildirib, bugun bo‘lib o‘tgan muzokaralar tarixiy ahamiyatga ega ekanini, ularning natijasida ikki mamlakat o‘rtasidagi munosabatlar strategik sheriklik darajasiga ko‘tarilganini qayd etdi.

Fransiya yetakchisi o‘tkazilgan muzokaralar natijalarini va imzolangan bitimlarni olqishladi.

“Bir necha yil ichida biz energetika, suv resurslarini boshqarish, kommunal xizmatlar, transport, barqaror turizm kabi muhim sohalarda uzoq muddatli hamkorlik aloqalarini o‘rnatishga erishdik. Buning dalili sifatida Fransiya hukumati va Fransiya taraqqiyot agentligi ko‘magida fransuz kompaniyalari O‘zbekistonga investitsiya kiritayotgani, hududlarda qo‘shilgan qiymat va ish o‘rinlari yaratilayotgani, yoshlar kasb o‘rganib, hayotda o‘z o‘rnini topayotganini keltirishim mumkin”, dedi Emmanuel Makron.

Emmanuel Makron qabul marosimidagi nutqini o‘zbek tilida yakunladi.

“Yashasin O‘zbekiston, yashasin Fransiya, yashasin Fransiya—O‘zbekiston do‘stligi”, dedi u.

Tomonlar xalqlar farovonligi yo‘lida O‘zbekiston—Fransiya hamkorligini yanada mustahkamlashga qat’iy intilishlarini bildirdi.

O‘zbekiston prezidenti sharafiga qabul marosimidan lavhalar

Shavkat Mirziyoyevning Fransiyaga tashrifi haqida

O‘zbekiston prezidenti 11-fevral kuni Fransiya prezidenti Emmanuel Makronning taklifiga binoan davlat tashrifi bilan Parij shahriga keldi. 12–mart kuni Shavkat Mirziyoyevni rasmiy kutib olish marosimi bo‘libdi o‘tdi. So‘ng Yelisey saroyida Shavkat Mirziyoyev va Emmanuel Makron muzokaralar o‘tkazdi. Unda davlat rahbarlari ikki mamlakat o‘rtasida strategik sheriklik munosabatlarini o‘rnatish to‘g‘risida tarixiy qarorga keldi.

Muzokaralar yakunida prezidentlar Strategik sheriklik o‘rnatish to‘g‘risidagi qo‘shma deklaratsiyani qabul qildi. Davlat rahbarlari huzurida Mutaxassislar va talabalar harakatchanligi to‘g‘risidagi hukumatlararo bitim almashildi. Shuningdek, bir qator bitimlar imzolandi.