Индонезияда ҳарбийларнинг мамлакатни бошқаришдаги ваколатларини кенгайтирувчи қонун лойиҳасига қарши оммавий намойишлар бошланди. Бу ҳақда маҳаллий нашрлар хабар бермоқда.
Жакартада намойишчилар маҳаллий қонун чиқарувчи ҳокимият ваколатхонаси биносини граффити билан қоплаган. Шимолий Сулавеси вилоятида эса намойиш иштирокчилари полиция транспортига чиқиб, улар билан муштлашувга киришган.
Мамлакат пойтахти Жакартада намойишчилар мамлакат парламенти биносига кирган. Улар мажмуа тўсиғини бузганидан сўнг, полиция сув пуркагичларни ишга туширган. Бироқ намойишчиларнинг бир қисми ҳали ҳам парламентга тегишли ҳудудда қолмоқда.
Х ижтимоий тармоғида тарқалган видеоларда намойишчилар “инқилоб” дея ҳайқираётганини кўриш мумкин.
“Ҳарбийлар тўғрисидаги қонунга қарши оммавий намойиш полиция томонидан бостириляпти. Намойишчилар парламент биносидан узоқлаштирилди. Бундан олдин талабалар асосий дарвоза олдидаги тўсиқни бузиб, парламент ҳудудига кириб олишганди”, деб ёзмоқда Беритасату нашри.
Маҳаллий оммавий ахборот воситалари хабар беришича, намойиш пайтида бир неча киши жароҳат олган. Жабрланганларнинг аниқ сони ҳозирча маълум қилинмаган. Бироқ намойиш иштирокчилари асосан талабалар — ижтимоий тармоқларда полиция билан тўқнашувлар оқибатлари ҳақида фаол равишда маълумот тарқатиб, инсон ҳуқуқлари ҳимоячиларини вазиятга аралашишга чақирмоқда.
Бунга қадар пайшанба куни Индонезия парламенти Индонезия қуролли кучлари тўғрисидаги қонунга мунозарали ўзгартириш киритиб, ҳарбийлар эгаллаши мумкин бўлган давлат лавозимларининг рўйхатини кенгайтирган эди. Ушбу ўзгартиришга қарши чиқувчилар бу ҳолат ҳарбийлар томонидан ҳокимиятни суиистеъмол қилиш ва инсон ҳуқуқларининг бузилишига олиб келишидан хавотирда.
Қайта кўриб чиқилган қонун амалдаги ҳарбий хизматчилар эгаллаши мумкин бўлган фуқаролик давлат лавозимлари сонини 10 тадан 15 тагача кенгайтирмоқда.
Қўшимча бешта лавозимга сиёсий, ҳуқуқий ва хавфсизлик масалалари бўйича мувофиқлаштирувчи вазирлик, бош прокуратура ва олий суддаги лавозимлар киради.
Изоҳ (0)