Futbol bo‘yicha Jahon chempionati saralash bosqichi doirasidagi O‘zbekiston va Qirg‘iziston terma jamoalari o‘rtasidagi bahs oldidan matbuot anjumani tashkil etildi.
Unda O‘zbekiston terma jamoasi bosh murabbiyi Temur Kapadze va futbolchi Odil Hamrobekov ishtirok etdi.
O‘yin haqida
Ertaga qiziqarli uchrashuv kutmoqda. Tayyorgarlik yaxshi o‘tdi. Bugun oxirgi mashg‘ulotni o‘tkazamiz va o‘ylaymanki hammasi joyida. Jamoalarning avvalgi to‘qnashuvi tarixda qoldi. Ertangi bellashuvga hamma futbolchilar tayyor.
Meni oldimga qo‘yilgan vazifa bor va hozir faqat shuni o‘ylayapman. Butun jamoa bilan shu yo‘lda harakat qilishimiz zarur. Shu bois Olimpiada olib chiqqan murabbiy bo‘lib tarixga kirganimizni hayolimga ham keltirganim yo‘q. Hozir birinchi vazifa — Jahon chempionatiga chiqish.
Raqiblarimizning avvalgi yillardagi nayrangi? To‘g‘risini aytsam, buni o‘ylaganim yo‘q. Sababi hammasi o‘z qo‘limizda va oldindagi barcha o‘yinlarni yutsak kifoya. Eronga qarshi o‘yinga o‘z rejalarimiz bor va shu asosida davom etamiz. Hozirgi vaziyatdan kelib chiqib maydonda borimizni ko‘rsatishimiz kerak.
Har bir uchrashuv o‘ziga yarasha asabiy o‘tadi. Nasib etsa, ertaga biz o‘z futbolimizni namoyish etib, ularga o‘yin bermaslikka harakat qilamiz. Eng asosiysi — g‘alaba. Uchrashuv asabiy o‘tadimi yoki yo‘q, birinchi navbatda g‘alaba qozonishimiz kerak.
Aliqulovning jarohati haqida
Husniddin Aliqulov biz uchun katta yo‘qotish bo‘ldi. Bu futbol. Unda hamma narsa bo‘lishi mumkin. Shunday tomonlarga tayyor turishimiz kerak. Aliqulovning o‘rnini bosadigan boshqa futbolchilar bor va ertangi bahsda o‘zini ko‘rsatadi deb umid qilaman.
Hojimat Erkinovning chaqirilishi haqida
Oston O‘runov o‘zini noqulay his qilgani uchun Hojimat Erkinovni chaqirdik. Ostonga sog‘lik tilab qolamiz. OAVda futbolchilarni chalg‘itadigan xabarlar ko‘p uchraydi. Ammo bu futbolchilarga ta’sir qilmaydi. Oldinda ikkita o‘yin bor, shuning uchun tavakkal qilishni istamadim.
Odil Hamrobekov bildirgan fikrlar
Avvalo o‘tgan 3,5 yil uchun Janob Katanesga rahmat aytamiz. Hamma yaxshi tayyorgarlik ko’rdi va ertangi bahsga tayyormiz. Uchrashuv juda muhim ekanligini tushunib turibmiz. Shu bois g‘alaba uchun bor kuchimiz bilan harakat qilamiz.
Maydonda nomlar o‘ynamaydi. Futbolchi harakat qiladi. Shu boisdan raqibni mensimaslik kerak degan gap yo‘q. 90 daqiqalik o‘yinda bir daqiqa ham chalg‘ishga haqqimiz yo‘q. Maydonni holati juda yaxshi. Muxlislarning qo‘llab-quvvatlashi juda muhim.
Abduqodir Husanovda yulduzlik kasali kuzatilmadimi? Hozircha bunday narsa kuzatilgani yo‘q. Uning “Siti”ga o‘tishi yosh futbolchilar uchun motivatsiya bo‘ldi. U haqiqiy professional.
Izoh (0)