Темур Кападзе Ҳусниддин Алиқуловнинг жароҳати ҳақида: “Бу катта йўқотиш, лекин бизда бошқа футболчилар ҳам бор” 

Футбол бўйича Жаҳон чемпионати саралаш босқичи доирасидаги Ўзбекистон ва Қирғизистон терма жамоалари ўртасидаги баҳс олдидан матбуот анжумани ташкил этилди.

Унда Ўзбекистон терма жамоаси бош мураббийи Темур Кападзе ва футболчи Одил Ҳамробеков иштирок этди.

Ўйин ҳақида

Эртага қизиқарли учрашув кутмоқда. Тайёргарлик яхши ўтди. Бугун охирги машғулотни ўтказамиз ва ўйлайманки ҳаммаси жойида. Жамоаларнинг аввалги тўқнашуви тарихда қолди. Эртанги беллашувга ҳамма футболчилар тайёр. 

Мени олдимга қўйилган вазифа бор ва ҳозир фақат шуни ўйлаяпман. Бутун жамоа билан шу йўлда ҳаракат қилишимиз зарур. Шу боис Олимпиада олиб чиққан мураббий бўлиб тарихга кирганимизни ҳаёлимга ҳам келтирганим йўқ. Ҳозир биринчи вазифа — Жаҳон чемпионатига чиқиш.

Рақибларимизнинг аввалги йиллардаги найранги? Тўғрисини айтсам, буни ўйлаганим йўқ. Сабаби ҳаммаси ўз қўлимизда ва олдиндаги барча ўйинларни ютсак кифоя. Эронга қарши ўйинга ўз режаларимиз бор ва шу асосида давом этамиз. Ҳозирги вазиятдан келиб чиқиб майдонда боримизни кўрсатишимиз керак. 

Ҳар бир учрашув ўзига яраша асабий ўтади. Насиб этса, эртага биз ўз футболимизни намойиш этиб, уларга ўйин бермасликка ҳаракат қиламиз. Энг асосийси — ғалаба. Учрашув асабий ўтадими ёки йўқ, биринчи навбатда ғалаба қозонишимиз керак.

Алиқуловнинг жароҳати ҳақида

Ҳусниддин Алиқулов биз учун катта йўқотиш бўлди. Бу футбол. Унда ҳамма нарса бўлиши мумкин. Шундай томонларга тайёр туришимиз керак. Алиқуловнинг ўрнини босадиган бошқа футболчилар бор ва эртанги баҳсда ўзини кўрсатади деб умид қиламан.

Ҳожимат Эркиновнинг чақирилиши ҳақида

Остон Ўрунов  ўзини ноқулай ҳис қилгани учун Ҳожимат Эркиновни чақирдик. Остонга соғлик тилаб қоламиз. ОАВда футболчиларни чалғитадиган хабарлар кўп учрайди. Аммо бу футболчиларга таъсир қилмайди. Олдинда иккита ўйин бор, шунинг учун таваккал қилишни истамадим.

Одил Ҳамробеков билдирган фикрлар

Аввало ўтган 3,5 йил учун Жаноб Катанецга раҳмат айтамиз. Ҳамма яхши тайёргарлик кўрди ва эртанги баҳсга тайёрмиз. Учрашув жуда муҳим эканлигини тушуниб турибмиз. Шу боис ғалаба учун бор кучимиз билан ҳаракат қиламиз.

Майдонда номлар ўйнамайди. Футболчи ҳаракат қилади. Шу боисдан рақибни менсимаслик керак деган гап йўқ. 90 дақиқалик ўйинда бир дақиқа ҳам чалғишга ҳаққимиз йўқ. Майдонни ҳолати жуда яхши. Мухлисларнинг қўллаб-қувватлаши жуда муҳим. 

Абдуқодир Ҳусановда юлдузлик касали кузатилмадими? Ҳозирча бундай нарса кузатилгани йўқ. Унинг “Сити”га ўтиши ёш футболчилар учун мотивация бўлди. У ҳақиқий профессионал.