O‘zbekiston milliy jamoasi mart oyida Jahon chempionati saralashidan o‘rin olgan 2 ta bahsda ishtirok etadi. Katanes sog‘ligidagi muammo sabab o‘zaro kelishuvga asosan shartnomani bekor qilgach, uning o‘rniga Temur Kapadze tayinlandi. “Daryo” muhim o‘yinlar oldidan O‘zbekiston milliy jamoasi bosh murabbiyidan intervyu oldi. Quyida ushbu intervyuni e’tiboringizga havola etamiz.
Antaliyaga safar haqida
Hozirda deyarli barcha jamoamiz Antaliyada yig‘in o‘tkazmoqda. Men ham klublarimiz o‘tkazayotgan o‘yinlarni joyidan ko‘rish, futbolchilarning holati qanday ekanligiga o‘zim guvoh bo‘lish uchun Turkiyaga borib keldim. Jamoalarimiz deyarli har kuni o‘yin o‘tkazishdi va har bir o’yinga iloji boricha borishga harakat qildim. Hozir qishki tanaffus bo‘lganligi uchun ko‘p futbolchilar optimal formada emas, shu sababli jamoalarning yig’inlari orqali aniq fikr bildira olmayman. Uchrashuvlar davomida klub murabbiylari bilan terma jamoaga loyiq bo‘lgan futbolchilarning hozirgi haqida suhbatlashdim. Safar davomida ba’zi futbolchilarning o‘yinini alohida kuzatdim va o’zim uchun kerakli xulosalarni oldim deya olaman. Eng asosiysi — jamoalar yangi mavsumga yaxshi tayyorgarlik ko‘rmoqda, hamma futbolchilar sog‘-salomat.
Terma jamoadagi dastlabki yig‘in haqida
Bilasizlar, ushbu yig‘in yanvar oyida bo‘ldi. Ko‘plab futbolchilarimiz endi tayyorgarlik ko‘rayotgan edi va ular optimal formada emasdi. Shuningdek, ushbu o‘rtoqlik uchrashuviga asosan ichki chempionatdagi terma jamoaga nomzod futbolchilar taklif qilindi. Bundan ko‘zlangan asosiy maqsad — terma jamoadagi hozirgi muhitdan xabardor bo‘lish edi. Sababi mart oyida bo‘ladigan yig‘in payti bizda juda ham kam vaqt bo’ladi va bu paytgacha terma jamoada nimalarni o‘zgartirsa bo‘ladi, degan savollarga javob topish edi. Terma jamoaning ushbu yig‘inida yangi futbolchilar ko‘p bo‘ldi, ularning holati qanday ekanligi bo‘yicha aniq to‘xtamga keldim.
Ilk bora chaqiruv olgan futbolchilarga kam vaqt berganim sababi ularga bo’lgan ishonchsizlik emas, balki tarkibdagi barcha futbolchilarni ko‘zdan kechirish edi. Maksimal darajasida butun tarkibni o‘ynatishga harakat qildim. Ba’zi futbolchilar o‘z darajasida o‘ynay olmagan bo‘lsa-da, ularni ayblay olmaymiz. Chunki bu — terma jamoa. Uning libosini kiygach, barchada hayajon bo‘lishi tabiiy.
Yana bir asosiy sabablarida biri — qishki yig‘in payti, Superligada mavsum tugagan, ko‘pchilik endi ta’tildan mashg‘ulotlarga qaytmoqda va albatta bu o‘yinga jiddiy ta’sir o‘tkazadi. Shuningdek, terma jamoa hamda Superliga bahslari umuman boshqa daraja. Unga munosib bo‘lish uchun esa ko‘proq vaqt kerak.
Legionerlar haqida
Har bir legionerimiz bilan aloqada bo‘lib turibman. Ularning hozirgi holati qanday ekanligi haqida deyarli har kuni ma’lumot olishga harakat qilyapman. Barchasining jismoniy holati yaxshi darajada. Biroq Eron chempionatidagi ikki futbolchimizning jarohati biroz xavotirga solishi mumkin.
Yaqinda Jaloliddin Masharipov bilan gaplashdim. Uning hozirgi holati qanday ekanligi, qachon safga qaytishi va tiklana olishi uchun qancha muddat kerakligini so’radim. Bilishimcha, uning hozirgi formasi yaxshi, individual mashg’ulotlar olib boryapti. Umid qilamanki, shifokorlar ruxsat bersa, keyingi uchrashuvda maydonga tushadi.
Oston O‘runov borasida ham shu fikrlarni bildirish mumkin. To‘g‘ri uning holati Masharipovnikidan jiddiyroq, lekin gaplashganimda oldingidan ancha yaxshi ekanligini aytdi. Bilishimcha, yaqin kunlarda u ham umumiy mashg‘ulotlarga qaytadi. Biz uchun qancha tez tiklansa, shuncha yaxshi, lekin tavakkal qilish kerak deb o’ylamayman. Shu sababi shifokor bilan maslahatlashib, keyin navbatdagi qadamni bosish kerak.
“Aqtobe”ning taklifini rad etdim”
Menga ko’plab klublardan taklif bo‘lgani rost. Nomini aytadigan bo‘lsam, “Aqtobe” vakillari men bilan bog‘lanishdi. Bilasiz, men Qozog‘istonning ushbu klubida o‘ynaganman. Shu sababdan ham ular menga ishonch bildirishgan edi. Lekin u paytda men Olimpiya terma jamoasi bilan edim. Shu sababli ularning taklifiga rad javobini berdim.
“Ko‘p narsani o‘zgartirmoqchi emasman”
O‘zbekiston terma jamoasi bilan yil oxirigacha, aniqrog‘i noyabr oyigacha shartnoma imzoladim. Lekin shuni aytishim kerakki, men uchun hech qanday bitim rol o‘ynamagan. Chunki bu — terma jamoa. Aslida hammasi juda tez bo‘lib ketdi. Srechko Katanes jamoa ixtiyoriga kela olmasligini bilgach, rahbariyatdan iste’fo so‘rashga majbur bo‘ldi. Shu sababli, kelishuv muddati qachongacha yoki qanday ekanligiga katta e’tibor bermadim.
Terma jamoada doim balans bo‘lish kerak deb hisoblayman. Terma jamoa Katanes qo‘l ostida biroz himoyaviy o‘yin ko‘rsatgan, men esa aytgangizdek hujumkorroq o‘yinni ma’qul ko‘raman. Lekin har bir murabbiyning g‘alaba uchun o‘z rejalari bo‘ladi. Shu sababli ikkimizning qarashlarimiz turlicha bo‘lishi mumkin. Vaqt kam ekanligini hisobga olsak, jamoada ko‘p narsani o‘zgartiraman deya olmayman. Oldingi o‘yinlarni tahlil qilib chiqamiz, nimadur qo‘shish lozim bo‘lsa, qo‘shgan holda asosiy maqsadimizga yetish uchun harakat qilamiz. Futbolchilarimizning mahorati va potensiali ancha yuqori. Ular o’zlariga yuklatilgan vazifalarni bajara olishiga ishonaman. Uchrashuvga oz muddat qolganda yig‘ilishimizni hisobga olsak, barchasini murabbiylar shtabi futbolchilar bilan maslahatlashgan holda ma’qul variantni qilamiz.
Katanesning yordamchilari haqida
Srechko Katanesning yordamchi murabbiylarini tarkibda olib qolish mening qarorim edi. Sababi ular uch yarim yildan beri terma jamoa tarkibida ishlab kelmoqda va ichki holatni menga qaraganda yaxshiroq bilishadi. Federatsiya rahbarlari bu borada fikr so‘rashganda, Qatardagi yig‘indan so‘ng qarorimni bildirishimni aytdim. Keyinchalik ular bilan suhbatlashdim, savollar berdim va ular bilan mashg‘ulot olib bordim. Tushundimki, ularda barchasi professional darajada. Agar tarkibga yangi murabbiylar qo‘shish kerak bo‘lsa, buning hech qanday muammoli joyi yo‘q. Rahbariyat bilan kelishgan holda barchasini amalga oshiramiz.
Terma jamoaga nomzod futbolchilar haqida
Men uchun barcha futbolchi terma jamoa uchun nomzod futbolchi hisoblanadi. Agar futbolchining potensiali yuqori bo’lsa xoh xorijda o‘ynasin, xoh Superligamizda harakat qilsin men uchun doim MTJ uchun nomzodlar qatorida bo‘ladi. Hozirgi vaziyatdan kelib chiqib, ushbu pozitsiyaga qaysi futbolchi nomzod ekanligini tahlil qilib, qaror qabul qilishga majbur bo‘lamoqdamiz. Rasmiy uchrashuvlarda 23 yoki 24 futbolchi xizmatidan foydalana olishimiz mumkin. Shu bois, eng munosiblarini chaqirishga harakat qilamiz.
“Yangi futbolchilarni olovga tashlash — katta tavakkal”
Katanes o‘zi ishlagan uch yarim yil davomida Azizjon G‘aniyev yoki Ikromjon Aliboyevni ham terma jamoa yig‘iniga taklif qilgan. Menimcha, qaysidir jihatlari to‘g‘ri kelmagandirki, ularni boshqa tarkibga jalb qilmagan. Albatta bu uning qarori va boshqalar uni hurmat qilishi kerak edi. Menga keladigan bo‘lsak, men terma jamoaga nomzod futbolchilarning har birining o‘yinlarini kuzatib bormoqdaman. Aytib o‘tishim kerakki, hozirgi payt bizning vaqtimiz juda kam. Rasmiy uchrashuvlardan 3 kun oldin yig‘ilib, tezda o‘yin o‘tkazishimizga to‘g‘ri keladi. Yangi futbolchilarni olib kelib, ularni sinab ko‘rmasdan olovga tashlash esa katta tavakkal hisoblanadi. Lekin oldin o‘ynagan yoki yaqin yillar davomida chempionat doirasida o‘ynagan nomzodlar kengaytirilgan tarkibda bo‘ladi. Imkon bo‘lishi bilan ularni yig‘inga taklif qilamiz. Qirg‘iz Respublikasi va Eronga qarshi bahslarda yangi futbolchilarni tarkibda ko‘rishimiz mumkin. Lekin ularni yangi deb hisoblash ham xato, aslida. Sababi, ko‘pchilik Qatardagi yig‘inda MTJdagi debyutini o‘tkazgan bo‘lsa, qolganlari avvalroq milliy jamoa libosida harakat qilgan. Murabbiylar shtabi bilan hali maslahatlashib ko‘ramiz va yakuniy qarorni e’lon qilamiz.
Abbosbek Fayzullayev qaysi pozitsiyada o‘ynaydi?
Abbos Fayzullayev SSKA va Milliy terma jamoada turli xil pozitsiyalarda o‘ynaydi. Men esa futbolchining kuchli tarafidan maksimal foydalanishga harakat qilaman. Abbos turli xil pozitsiyalarda o‘ynay olishi — uning va terma jamoaning yutug‘i. Jamoa o‘yini uchun tanlangan taktika bo‘yicha qaror qabul qilamiz. Sababi hozir SSKA ham turli xil taktikalarni sinab ko‘rmoqda. Hozir bu haqida emas, ko‘proq futbolchilarning yig‘inga yaxshi formada hamda sog‘-salomat kelishidan umid qilmoqdamiz. Agar o‘yin uchun asosiy tarkibni tanlashda qiyinchilikka uchrashsak, albatta bu bizning va MTJning yutug‘i hisoblanadi.
To‘liq videoni YouTubedagi kanalimizda ko‘rishingiz mumkin.
Jamshidbek Mahmudov suhbatlashdi
Izoh (0)