“Daryo” reportaji: “Chegara posti ochilishini 15 yil kutdik”

Namanganda Qirg‘izistonning Jalolobod viloyati bilan bog‘lovchi “Uchqo‘rg‘on” chegara bojxona posti qayta ochildi. Bu haqda “Daryo” muxbiri Azizbek Abduvaliyev xabar bermoqda.

Ushbu chegara postida 2010-yilda transport vositalarining harakatlanishi to‘xtatilgan, 2016-yilda esa butunlay yopilgan edi.

Ikki davlat rahbarlarining saʼy-harakatlari natijasida O‘zbekistonning “Uchqo‘rg‘on” va Qirg‘izistonning “Kensay” o‘tkazish punktlari faoliyati qayta tiklanishi belgilab olindi.

Joriy yil mart oyida ushbu hududda qurilish ishlari boshlanib, 75 milliard so‘m mablag‘ sarflandi va qisqa vaqt davomida ikki mamlakat uchun bir xil ko‘rinishdagi chegara bojxona postlari qurildi.

“Bu voqeani namanganliklar uchun chinakam bayram, Mustaqillik ayyomiga munosib tuhfa desak bo‘ladi. Chunki ushbu chegara postining ochilishini qariyb 15 yil kutdik. Uning qayta tiklanishi viloyat iqtisodiyotiga juda katta turtki beradi. Namanganda ishlab chiqarilayotgan tekstil, qurilish va oziq-ovqat mahsulotlariga qo‘shnilarimizda qiziqish kuchli, o‘z navbatida, Qirg‘izistonning sifatli ko‘miri bozorlarimizda xaridorgir. Qolaversa, chegara posti atrofida kelgusida 100 gektar maydonda logistika markazi qurish loyihasi ishlab chiqilgan, bu esa ko‘plab yangi ish o‘rinlari paydo bo‘lishini anglatadi”, deydi Namangan viloyati hokimi Shavkat Abdurazzoqov.

Viloyat bojxona boshqarmasi mutasaddilarining bildirishicha, chegara posti ochilgandan so‘ng bir kunda o‘rtacha 10 000 nafarga yaqin fuqaro, 500 dan ortiq yuk hamda 300 dan ziyod yengil transport vositalari harakati kutilmoqda.

Chegara postlarining ochilish marosimda Qirg‘iziston Respublikasi Vazirlar Mahkamasi rais o‘rinbosari Boqit To‘raboyev hamda O‘zbekiston Respublikasi bosh vaziri o‘rinbosari Ochilboy Ramatov ishtirok etdi. Ramziy lentalar qirqilib, ushbu tadbirdan esdalik sifatida daraxt ko‘chatlari ekildi.