“Xalqaro shartnomani tasdiqlash to‘g‘risida”gi prezident qarori qabul qilindi. Bu haqda Adliya vazirligi xabar berdi.
Qarorga ko‘ra, 2006-yil 3-oktyabrdagi O‘zbekiston va Qirg‘iziston hukumatlari o‘rtasida fuqarolarning o‘zaro kelib-ketishlari to‘g‘risidagi bitimga o‘zgartirishlar kiritish haqidagi bayonnoma tasdiqlandi.
Bayonnoma 2024-yil 18-iyul kuni Toshkent shahrida imzolangan. Ichki ishlar vazirligi va Davlat xavfsizlik xizmati Chegara qo‘shinlari ushbu xalqaro shartnomani amalga oshirish uchun mas’ul bo‘lgan vakolatli organlar etib belgilandi.
Vazirlar Mahkamasi hamda tegishli vazirlik va idoralarning rahbarlari mazkur xalqaro shartnoma kuchga kirgandan keyin belgilangan tartibda uning qoidalari amalga oshirilishi ustidan nazoratni ta’minlaydi.
Bundan avval Qirg‘iziston O‘zbekiston va Tojikiston bilan chegaradagi yana bir nechta o‘tkazish punktida yuk mashinalari nazoratini o‘rnatmoqchiligi haqida xabar berilgandi. Shuningdek, O‘zbekiston va Qirg‘iziston mahkumlarni almashishi aytilgan.
O‘zbekiston, Qirg‘iziston va Tojikiston hukumatlari rahbarlari uch tomonlama uchrashuv o‘tkazadi. Uch tomonlama uchrashuv Qirg‘iziston, O‘zbekiston va Tojikiston davlat chegaralari kesishmasida bo‘lib o‘tadi.
Izoh (0)