10-avgustdan boshlab Qirg‘iziston va O‘zbekiston chegarasidagi “Do‘stlik” nazorat o‘tish punkti orqali o‘tuvchi yo‘lovchi va transportlar oqimi oshdi. Qirg‘iziston Milliy xavfsizlik davlat qo‘mitasi Chegara xizmati buning sababini tushuntirdi.
![](/static/2024/08/28/photo_2024-08-28_14-40-32-Er8jPOmf.jpg)
Ma’lum qilinishicha, ushbu nazorat-o‘tkazish punktidan kuniga 18-26 ming kishi o‘tmoqda. Biroq chegarani uzluksiz nazorat qilish sharoitida, mazkur punktning o‘tkazish imkoniyati sutkasiga 16 ming 400 kishini tashkil etadi.
Qirg‘iziston—O‘zbekiston davlat chegarasini “Do‘stlik” nazorat-o‘tkazish punkti orqali kesib o‘tayotgan fuqarolar va transport vositalari sonining sezilarli darajada ortishi navbatlar va o‘tish punktida yengil transport vositalarining to‘planishiga sabab bo‘lmoqda. Bu O‘sh viloyatidagi bozorlar faoliyati (bozorlarda ulgurji savdo kunlari — seshanba va shanba), talabalarning o‘qish joylariga yetib kelishi, davom etayotgan turizm mavsumi va mavsumiy ishlar bilan bog‘liqdir, deyiladi xabarda.
Ta’kidlanishicha, nazorat-o‘tkazish punktida davlat chegarasini kesib o‘tayotgan fuqarolar uchun qulay sharoitlar yaratilgan bo‘lib, ularni yanada yaxshilash bo‘yicha reja asosida ishlar olib borilmoqda.
Qirg‘iziston—O‘zbekiston davlat chegarasida joylashgan nazorat-o‘tkazish punktlari odatdagi tartibda ishlamoqda. Hozirgi vaqtda o‘tish punktida 33 ta pasport nazorati kabinasi faoliyat ko‘rsatmoqda.
28-avgust holatiga ko‘ra, Qirg‘iziston—O‘zbekiston davlat chegarasining quyidagi nazorat-o‘tkazish punktlari faoliyat ko‘rsatmoqda:
Jalolobod viloyatida: “Madaniyat”, “Baymoq”;
O‘sh viloyatida: “Do‘stlik”;
Botken viloyatida: “Qizil-Qiya”, “Qadamjoy”, “Qaytpas”, “Oq-Qiya”, “O‘tukchi”, “Chashma”.
Qirg‘iziston Milliy xavfsizlik davlat qo‘mitasining Chegara xizmati fuqarolarga safarlarini va yo‘l marshrutlarini oldindan rejalashtirishni tavsiya qiladi.
Izoh (0)