Sirdaryo viloyatida tabiiy gazdan noqonuniy foydalangan korxonalar aniqlandi, deb xabar bermoqda “Hududgazta’minot”.
Unga ko‘ra, “Hududgaz Sirdaryo” gaz ta’minoti filiali komplayens nazorat tuzilmalari, tuman gaz ta’minoti bo‘limi xodimlari va huquq-tartibot organlari hamkorligida Sirdaryo viloyati Guliston shahrida o‘tkazilgan mana shunday reydlar vaqtida qonunbuzilish holatlari fosh etildi.
Shaharning “Namuna” MFYda joylashgan “Sh. A. H.” MCHJga qarashli binoda gazdan foydalanish holati ko‘zdan kechirilganda iste’molchi elektron gaz hisoblash uskunasiga o‘rnatilgan bir martalik tamg‘ani o‘zboshimchalik bilan olib tashlab, tabiiy gazdan noqonuniy foydalanib kelayotgani aniqlandi. Holat yuzasidan dalolatnoma tuzilib, gaz sarfi qayta hisob-kitob qilindi va 212 million 710 ming so‘mlik zarar aniqlandi.
Guliston shahrining “Sohil” MFYdagi “A. F. M.” MCHJga qarashli parrandachilik fermasida xuddi shundan qonunbuzilish holati qayd etildi. Noqonuniy holat bo‘yicha qayta hisob-kitob amalga oshirildi va 57 million 743 ming so‘mlik zarar hisoblandi.
Gaz o‘g‘irlayotgan ohak sexlari
Mart oyida Samarqand viloyatining Paxtachi tumanida 4 mlrd so‘mlik tabiiy gazdan noqonuniy foydalangan yashirin ohak sexi fosh etilgan edi. Aprelda esa Farg‘onada 69,4 mln so‘mlik tabiiy gazdan noqonuniy foydalangan ohak sexi aniqlangan.
May oyida esa yana Farg‘onada 289 mln so‘mlik tabiiy gazdan noqonuniy foydalanib, ohak sexi tashkil etilganligi aniqlangan edi. Avgust oyida Samarqandda 3,3 mlrd so‘mlik tabiiy gazdan noqonuniy foydalanib, ohak sexi tashkil etgan shaxs ushlangandi.
Sentyabrda Farg‘onada gazdan noqonuniy foydalangan ohak sexi mas’ullari davlatga 5,5 mlrd so‘mdan ziyod zarar yetkazdi. Shu bilan birga, aynan Farg‘ona shahrida noqonuniy ohak ishlab chiqarish sexi tashkil qilib, 544,6 mln so‘mlik tabiiy gazni o‘g‘irlaganlar qo‘lga tushgan edi.
Yuqoridagi holatlar bo‘yicha barcha hujjatlar huquqni muhofaza qiluvchi organlarga yuborildi.
Izoh (0)