Toshkent shahrida 440 mln so‘mlik tabiiy gazdan noqonuniy foydalangan issiqxona aniqlandi, deb xabar bermoqda “Hududgazta’minot”.
Keltirilishicha, “Hududgazta’minot” AJ Boshqaruv raisining tegishli topshirig‘i bilan respublikaning barcha hududlarida tabiiy gazdan noqonuniy foydalanish holatlarini aniqlash bo‘yicha nazorat tadbirlari davom ettirilmoqda.
Toshkent shahar Sergeli tumanida “Hududgaz Poytaxt” gaz ta’minoti filiali komplayens nazorat tuzilmalari, O‘zenergoinspeksiya xodimlari va huquq-tartibot organlari hamkorligida o‘tkazilgan reyd jarayonida qonun buzilishi holati fosh etildi.
Sergeli tumani Samo ko‘chasida istiqomat qiluvchi fuqaro o‘z xonadonida issiqxona tashkil qilgan holda tabiiy gaz tarmog‘iga rezina shlang orqali ulanib, “zangori yoqilg‘i”dan noqonuniy foydalanib kelayotgani ma’lum bo‘ldi. Holat yuzasidan tegishli tartibda dalolatnoma tuzilib, sarflangan tabiiy gaz hajmi qayta hisob-kitob qilindi va 440 million 967 ming so‘mlik zarar aniqlandi.
Noqonuniy holat bo‘yicha barcha hujjatlar huquqni muhofaza qiluvchi organlarga yuborildi.
Gaz o‘g‘irlayotgan ohak sexlari
Mart oyida Samarqand viloyatining Paxtachi tumanida 4 mlrd so‘mlik tabiiy gazdan noqonuniy foydalangan yashirin ohak sexi fosh etilgan edi. Aprelda esa Farg‘onada 69,4 mln so‘mlik tabiiy gazdan noqonuniy foydalangan ohak sexi aniqlangan.
May oyida esa yana Farg‘onada 289 mln so‘mlik tabiiy gazdan noqonuniy foydalanib, ohak sexi tashkil etilganligi aniqlangan edi. Avgust oyida Samarqandda 3,3 mlrd so‘mlik tabiiy gazdan noqonuniy foydalanib, ohak sexi tashkil etgan shaxs ushlangandi.
Sentyabrda Farg‘onada gazdan noqonuniy foydalangan ohak sexi mas’ullari davlatga 5,5 mlrd so‘mdan ziyod zarar yetkazdi. Shu bilan birga, aynan Farg‘ona shahrida noqonuniy ohak ishlab chiqarish sexi tashkil qilib, 544,6 mln so‘mlik tabiiy gazni o‘g‘irlaganlar qo‘lga tushgan edi.
Izoh (0)