Toshkent shahrida 440,9 mln so‘mlik tabiiy gazdan noqonuniy foydalangan issiqxona fosh etildi, deb xabar bermoqda “O‘zenergoinspeksiya”.
Unga ko‘ra, holat “O‘zenergoinspeksiya” Toshkent shahar hududiy boshqarmasi, shahar prokuraturasi va gaz ta’minoti korxonasi hamkorligida o‘tkazilgan nazorat tadbirida aniqlangan. Sergeli tumani “Qumariq” MFYda istiqomat qiluvchi fuqaro R.G‘. ga qarashli xonadonda tashkil qilingan issiqxona hech qanday hujjatlarsiz, to‘g‘ridan to‘g‘ri gaz tarmog‘iga ulanib, tabiiy gazdan noqonuniy foydalangan.
Ushbu qoidabuzarliklar natijasida dastlabki hisob-kitoblarga ko‘ra gaz ta’minoti korxonasiga 440,9 million so‘mlik zarar yetkazgani ma’lum bo‘ldi.
Mazkur holat yuzasidan tegishli hujjatlar rasmiylashtirilib, huquqni muhofaza qiluvchi organlarga yuborildi.
Gaz o‘g‘irlayotgan ohak sexlari
Mart oyida Samarqand viloyatining Paxtachi tumanida 4 mlrd so‘mlik tabiiy gazdan noqonuniy foydalangan yashirin ohak sexi fosh etilgan edi. Aprelda esa Farg‘onada 69,4 mln so‘mlik tabiiy gazdan noqonuniy foydalangan ohak sexi aniqlangan.
May oyida esa yana Farg‘onada 289 mln so‘mlik tabiiy gazdan noqonuniy foydalanib, ohak sexi tashkil etilganligi aniqlangan edi. Avgust oyida Samarqandda 3,3 mlrd so‘mlik tabiiy gazdan noqonuniy foydalanib, ohak sexi tashkil etgan shaxs ushlangandi.
Sentyabrda Farg‘onada gazdan noqonuniy foydalangan ohak sexi mas’ullari davlatga 5,5 mlrd so‘mdan ziyod zarar yetkazdi. Shu bilan birga, aynan Farg‘ona shahrida noqonuniy ohak ishlab chiqarish sexi tashkil qilib, 544,6 mln so‘mlik tabiiy gazni o‘g‘irlaganlar qo‘lga tushgan edi.
Izoh (0)