Samarqand viloyati Jomboy tumanidagi korxona 124 mln so‘mlik gazdan o‘g‘rincha foydalanib kelgani aniqlandi. Bu haqda Prokuratura departamenti xabar berdi.
Ma’lum qilinishicha, holat Bosh prokuratura huzuridagi вepartamentning Jomboy tumani bo‘limi tomonidan o‘tkazilgan tergovga qadar tekshiruvda aniqlangan. “Sh.P.” oilaviy korxonasi ish boshqaruvchisi S.A. korxona umumiy oshxonasida hisoblagichdan tashqari gaz tarmog‘iga tijorat maqsadida o‘zboshimchalik bilan ulanib, jami 124,2 mln so‘mlik tabiiy gazdan noqonuniy foydalangan.
Mazkur holat yuzasidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilib, tergov harakatlari o‘tkazilmoqda.
Gaz o‘g‘irlayotgan ohak sexlari
Mart oyida Samarqand viloyatining Paxtachi tumanida 4 mlrd so‘mlik tabiiy gazdan noqonuniy foydalangan yashirin ohak sexi fosh etilgan edi. Aprelda esa Farg‘onada 69,4 mln so‘mlik tabiiy gazdan noqonuniy foydalangan ohak sexi aniqlangan.
May oyida esa yana Farg‘onada 289 mln so‘mlik tabiiy gazdan noqonuniy foydalanib, ohak sexi tashkil etilganligi aniqlangan edi. Avgust oyida Samarqandda 3,3 mlrd so‘mlik tabiiy gazdan noqonuniy foydalanib, ohak sexi tashkil etgan shaxs ushlangandi.
Sentyabrda Farg‘onada gazdan noqonuniy foydalangan ohak sexi mas’ullari davlatga 5,5 mlrd so‘mdan ziyod zarar yetkazdi. Shu bilan birga, aynan Farg‘ona shahrida noqonuniy ohak ishlab chiqarish sexi tashkil qilib, 544,6 mln so‘mlik tabiiy gazni o‘g‘irlaganlar qo‘lga tushgan edi.
Izoh (0)