Mobil internetga ulanishni ta’minlovchi qurilmalar va xizmatlarni taklif etuvchi GlocalMe kompaniyasi Barselonadagi MWC 2025 ko‘rgazmasida uy hayvonlari uchun dunyodagi birinchi smartfonni taqdim etdi. Bu haqda Korrespondent xabar berdi.

PetPhone deb nomlangan qurilma jonivorning yoqasiga mahkamlanadi va uy hayvoni egasining smartfonidagi ilova orqali oldindan yozib olingan ovozni masofadan yetkazishiga xizmat qiladi. Shuningdek, ilova uy hayvoni “so‘zlari” ning ma’nosini sun’iy intellekt yordamida izohlaydi va qo‘ng‘iroq qilish imkonini beradi.

Qurilmada dinamikdan tashqari hayvonni qorong‘ilikda topishga yordam beradigan kichik chiroq ham bor. Smartfon bir vaqtning o‘zida bir nechta boshqa tizimlar, jumladan, GPS, AGPS, LBS, WiFi, Bluetooth bilan ishlaydi va 50 metr radiusdagi faol radar yordamida hayvonni kuzatish imkonini beradi.
PetPhone orqali to‘rt oyoqli do‘stingizni bino ichida, ochiq havoda va hatto tunnellarda ham kuzatish mumkin. Bundan tashqari, uning trayektoriyasini xaritada kuzatish va xavfsiz hududni tark etgan vaqtda (ilovada avvaldan tanlanadi) avtomatik ogohlantirish olish mumkin.

Mobil ilova hayvonlarni sevuvchilar uchun ijtimoiy tarmoq vazifasini ham bajaradi. Gadjet IP67 standartiga muvofiq suv va changdan himoyalangan hamda 200 dan ortiq mamlakatlarda foydalanish uchun mo‘ljallangan. Qurilmaning narxi va sotuvga chiqarish sanasi hozircha e’lon qilinmagan.
Izoh (0)