Мобил интернетга уланишни таъминловчи қурилмалар ва хизматларни таклиф этувчи GlocalMe компанияси Барселонадаги MWC 2025 кўргазмасида уй ҳайвонлари учун дунёдаги биринчи смартфонни тақдим этди. Бу ҳақда Корреспондент хабар берди.
PetPhone деб номланган қурилма жониворнинг ёқасига маҳкамланади ва уй ҳайвони эгасининг смартфонидаги илова орқали олдиндан ёзиб олинган овозни масофадан етказишига хизмат қилади. Шунингдек, илова уй ҳайвони “сўзлари” нинг маъносини сунъий интеллект ёрдамида изоҳлайди ва қўнғироқ қилиш имконини беради.
Қурилмада динамикдан ташқари ҳайвонни қоронғиликда топишга ёрдам берадиган кичик чироқ ҳам бор. Смартфон бир вақтнинг ўзида бир нечта бошқа тизимлар, жумладан, GPS, АGPS, LBS, WiFi, Bluetooth билан ишлайди ва 50 метр радиусдаги фаол радар ёрдамида ҳайвонни кузатиш имконини беради.
PetPhone орқали тўрт оёқли дўстингизни бино ичида, очиқ ҳавода ва ҳатто туннелларда ҳам кузатиш мумкин. Бундан ташқари, унинг траекториясини харитада кузатиш ва хавфсиз ҳудудни тарк этган вақтда (иловада аввалдан танланади) автоматик огоҳлантириш олиш мумкин.
Мобил илова ҳайвонларни севувчилар учун ижтимоий тармоқ вазифасини ҳам бажаради. Гаджет IP67 стандартига мувофиқ сув ва чангдан ҳимояланган ҳамда 200 дан ортиқ мамлакатларда фойдаланиш учун мўлжалланган. Қурилманинг нархи ва сотувга чиқариш санаси ҳозирча эълон қилинмаган.
Изоҳ (0)