Checheniston rahbari Ramzan Qodirovning 17 yoshli o‘g‘li Adam Arab arbitraj sudi a’zosi bo‘ldi. Bu haqda “RBK” xabar berdi.
Tegishli guvohnoma Qodirovning o‘g‘liga Checheniston vakillari delegatsiyasi tarkibida Misrga tashrifi chog‘ida topshirilgan. Qabul Arab arbitraj sudi qarorgohida bo‘lib o‘tgan.
Tashrifning muhim natijalaridan biri Adam Qodirovga muddatsiz Arab arbitraj sudi a’zosi guvohnomasining topshirilishi bo‘ldi. Shuningdek, unga ‘Liviyaning faxriy mehmoni’ medali topshirildi, dedi Ramzan Qodirov.
Tashrif maqsadi turli sohalarda investitsiyaviy hamkorlikni rivojlantirish va Arab arbitraj sudi doirasidagi xalqaro sheriklik masalalarini muhokama qilish bo‘lgan.
Arab davlatlari ligasining muhim iqtisodiy organlaridan biri — Arab iqtisodiy birligi kengashi bo‘lib, u 1964-yilda tashkil etilgan. Uning bosh qarorgohi Qohirada joylashgan. 2021-yilda kengash huzurida ham yuridik shaxslar o‘rtasidagi, ham davlatlararo darajada tijoriy, iqtisodiy, investitsiyaviy nizolarni hal qiluvchi instansiya — Arab arbitraj sudi tashkil etildi.
Arab davlatlari ligasi tashkiloti tashkil topganidan buyon ko‘plab mintaqaviy urushlarning guvohi bo‘ldi. Tashkilot arab mamlakatlari va Isroil o‘rtasidagi munosabatlarni yaxshilash va nizoga barham berish borasida ko‘p sa’y-harakat qilgan bo‘lsa-da, ayrim urinishlar muvaffaqiyatsiz yakunlandi.
Adam Qodirov
Ramzan Qodirovning o‘g‘li 17 yoshda. 2024-yil dekabr oyi boshida unga Kavkaz urushining faol ishtirokchisi, chechen qo‘mondoni, noib Imamat Baysungur Benoyevskiy ordeni abadiy saqlash uchun berilgan. O‘sha yilning avgust oyi oxirida unga respublikaning oliy mukofoti — Ahmad Qodirov ordeni topshirilgan.
2023-yil oktyabr oyida esa Checheniston Qahramoni unvoni berilgan. Bu o‘smir (o‘sha paytda u 15 yoshda edi) Grozniy qamoqxonasida Qur’onni yoqib yuborganlikda ayblangan Nikita Juravelni kaltaklaganidan keyin sodir bo‘lgan. Kaltaklash bilan bog‘liq jinoiy ish “jinoyat hodisasi yo‘qligi” sababli qo‘zg‘atilmagan.
Qodirovning o‘g‘lida yana bir qancha mukofotlar bor. Bundan tashqari, u Checheniston rahbari xavfsizlik xizmatida bo‘lim boshlig‘i hisoblanadi.
Izoh (0)