Qozog‘istonning Mang‘istov viloyati Mo‘ynoli tumanidagi uyda 7 kishi is gazidan zaharlangani haqida xabar berilgandi. Favqulodda vaziyatlar vazirligining axborot xizmati “Daryo”ga qurbonlarning bir nafari O‘zbekiston fuqarosi ekanini ma’lum qildi.
Mang‘istov viloyati hokimligi qurbonlarning bari O‘zbekiston fuqarolari ekani haqida xabar tarqatgandi.
O‘zbekistonlik erkak Qozog‘istonga borib, u yerda oila qurgan. Ayoli va bolalari Qozog‘iston fuqarolari hisoblanadi, deya izoh berdi FVV axborot xizmati.
Marhum 1980-yil Qoroqalpog‘istonda tug‘ilgan. Fojia 2-mart kuni Basquduq qishlog‘idagi xususiy uyda sodir bo‘lgan. Yordamga yetib kelgan qutqaruvchilar va tez tibbiy yordam brigadalari voqea joyida yetti kishini aniqlagan. Ulardan besh nafari voyaga yetmaganlar bo‘lgan, barchasi vafot etgan.
Dastlabki versiyasiga ko‘ra, hodisa gaz uskunalaridan foydalanish qoidalarining buzilishi oqibatida yuz bergan. Favqulodda hodisa sabablarini tekshirish uchun komissiya tuzilgan. Halok bo‘lgan oilaning yaqinlariga har tomonlama yordam ko‘rsatiladi, jumladan, dafn marosimi o‘tkaziladi. Vaziyat Mangistov viloyati hokimining shaxsiy nazoratiga olingan.
Izoh (0)