Samarqand viloyatining Paxtachi tumanida tarkibida oltin moddasi bo‘lgan toshlarni noqonuniy kavlab olayotgan 5 kishi zaharlandi. Bu haqda “Daryo”ga Bosh prokuratura axborot xizmati rahbari Hayot Shamsutdinov xabar qildi.
Ma’lum qilinishicha, 9-yanvar kuni soat 20:00 larda Paxtachi tumani “Guliston” mahallasida yashovchi besh kishi — J.S., O‘.E., S.N., Yu.A. va E.B. Paxtachi tumani “Qarnabota” MFY hududida joylashgan “Qoraqo‘ton” tog‘ koniga qarashli mahalliy til bilan “Nayman chuqqi” shaxtasiga tushib, generator va boshqa uskunalar yordamida tarkibida oltin moddasi bo‘lgan toshlarni kavlab olayotganida generatordan chiqqan is gazidan zaharlangan.
Oqibatda ularning ikki nafari — J.S. va O‘.E. shaxta ichi pastki qismiga yiqilib, shaxta devori toshlariga urilib voqea joyida vafot etgan. Qolgan fuqarolar is gazidan zaharlanish bilan 10-yanvar kuni soat 03:30 larda tuman markaziy shifoxonasiga keltirilgan.
Hozirda, ikki kishining o‘limi yuzasidan sudga oid tibbiyot ekspertizasi tayinlangan bo‘lib, holat yuzasidan Paxtachi tuman prokuraturasi tomonidan tergovga qadar tekshiruv harakatlari olib borilmoqda.
Oltinni noqonuniy qazib olish holatlari
Bundan bir necha yil avval Samarqand viloyati Paxtachi tumanida tarkibida sof oltin moddasi bo‘lgan ruda toshlarni talon-toroj qilish bilan bog‘liq holatlar tez-tez qayd etiladi. Ular tomonidan elektr energiyasidan noqonuniy foydalanish holatlari ham kuzatiladi.
Buning oqibati ayanchli yakunlangan holatlar ham talaygina. 2024-yil yanvarida Navoiydagi oltin koni shaxtasidan 30 yoshli erkakning jasadi topilgandi. U tarkibida oltin moddasi bo‘lgan ma’danli toshlarni talon-toroj qilish uchun kelgan va shaxtadan chiqayotganida arqon uzilib ketishi oqibatida 10-15 metrlik pastlikka tushib ketib, og‘ir tan jarohati olib vafot etgan.
2022-yilda Navoiyda oltinni noqonuniy kovlab olishga uringan 5 kishini tuproq bosib qolgandi. Ularning jasadi chuqurlikda qariyb 2 hafta qolib ketdi. 2021-yilda Jizzaxda oltin rudasini noqonuniy ravishda qazib olishga uringan to‘rt kishini tosh bosib qolgandi. Ularning 2 nafari voqea joyida vafot etgan. O‘sha yilda Zarafshonda tuproq tarkibidan tilla qumini kovlab olayotgan 4 kishi qum ostida qolib halok bo‘lgan.
Izoh (0)