Buxoroda gaz portlashi oqibatida ikki kishi vafot etdi
Buxoro viloyati, Jondor tumanidagi xonadonlardan birida 17-noyabr kuni soat 5:30 larda is gazi chiqishi oqibatida yong‘in kelib chiqqan. Bu haqda Bosh prokuratura matbuot xizmati “Daryo”ga xabar berdi.
Foto: “Daryo” / Dilruh Isomiddinova
Hodisa oqibatida ota-ona va ularning ikki nafar qizi kuyish jarohati bilan tez tibbiy yordamga murojaat qilgan. 21-noyabr kuni ona shifoxonada vafot etgan. Keyinroq esa ota ham vafot etdi.
Ushbu holat yuzasidan 22-noyabr kuni Jinoyat kodeksining 259-moddasi (yong‘in xavfsizligi qoidalarini buzish) bilan jinoyat ishi qo‘zg‘atilgan.
Hozirda ichki ishlar organlari tomonidan tergov harakatlari olib borilmoqda.
Avvalroq O‘zbekistonda 2024-yil boshidan buyon gaz bilan bog‘liq holatlar sabab 82 kishi vafot etgani haqida xabar berilgandi.
Is gazidan vafot etayotgan fuqarolar
2023-yil oktyabr oyida Samarqand viloyati Oqdaryo tumanidagi xonadonlarning birida uch kishi is gazidan zaharlanib vafot etgandi. Fevral oxirida esa Surxondaryoning Boysun tumanida bir oilaning 5 nafar a’zosi is gazidan vafot etgani to‘g‘risida xabar berilgan edi.
2024-yil mart oyida Farg‘ona viloyati Beshariq tumanida bir oilaning uch a’zosi is gazidan zaharlanib vafot etgandi. Shuningdek, Toshkent viloyatining Yangiyo‘l tumanida er-xotin is gazidan vafot etdi.
Oktyabr oyida Qoraqalpog‘istonning Nukus shahrida uch kishi is gazidan zaharlanib vafot etgandi. Noyabr oyi avvalida Andijon viloyatining Jalaquduq tumanida 4 kishi is gazidan zaharlanib vafot etdi.
Avvalroq Namangan viloyatining Pop tumanida bir oilaning 3 nafar aʼzosi is gazidan zaharlanib vafot etgani xabar qilingandi.
Favqulodda vaziyatlar vazirligi respublika aholisi hamda tashkilot, korxona va muassasalar rahbarlariga murojaat bilan chiqib, kunlar sovishi natijasida elektr, gaz yoki boshqa yoqilg‘ida ishlaydigan isitish moslamalaridan foydalanishda eʼtiborsizlik tufayli is gazidan zaharlanish, havo-gaz aralashmasining chaqnashi va yong‘inlar sodir bo‘lishi mumkinligini bildirib, bunday holatlarning oldini olish maqsadida tavsiyalar bergan edi.
Izoh (0)