O‘zbekistonda 2024-yil boshidan buyon gaz bilan bog‘liq holatlar sabab 82 kishi vafot etdi. Bu haqda AOKAda o‘tkazilgan brifingda “Hududgazta’minot” AJ boshqarma boshlig‘i Abdusattor Qayumov ma’lum qildi.
27-noyabr kuni o‘tkazilgan brifingda qayd etilishicha, joriy yil boshidan bugungi kunga qadar Respublika bo‘yicha gaz bilan bog‘liq jami 74 ta holat sodir bo‘ldi. Buning oqibatida vafot etgan fuqarolardan tashqari 80 kishi turli darajadagi tan jarohatlari oldi.
Ayrim holatlarda esa dudburon nosozligi oqibatida oilaning barcha a’zolari is gazidan zaharlanib vafot etdi.
“Afsuski ayrim fuqarolarning qoidalarni bilmasliklari, unutib qo‘yishlari, mensimasliklari yoki e’tiborsizliklari baxtsiz hodisalarni keltirib chiqarmoqda”, deydi Abdusattor Qayumov.
Gaz bilan bog‘liq ko‘ngilsiz holatlar soni 2023-yilning shu davri bilan taqqoslaganda nisbatan kamaygan. O‘tgan yili gaz bilan bog‘liq jami 86 ta holat sodir bo‘lgan. Buning oqibatida 88 kishi vafot etgan, 119 nafari turli darajadagi tan jarohatlar olgan.
Is gazidan vafot etayotgan fuqarolar
2024-yil mart oyida Farg‘ona viloyati Beshariq tumanida bir oilaning uch a’zosi is gazidan zaharlanib vafot etgandi. Toshkent viloyatining Yangiyo‘l tumanida er-xotin is gazidan halok bo‘ldi. Oktyabr oyida Qoraqalpog‘istonning Nukus shahrida uch kishi is gazidan zaharlanib vafot etdi. Noyabr oyi boshida Andijon viloyatining Jalaquduq tumanida 4 kishi is gazidan zaharlanib vafot etdi. 12-noyabrda Buxoro viloyati Kogon shahrida ayol va uning voyaga yetmagan farzandi is gazidan vafot etdi. 18-noyabr kuni Namangan viloyatining Pop tumanida bir oilaning 3 nafar aʼzosi is gazi qurboni bo‘ldi.
Izoh (0)