AQSH Shimoliy Koreyaga qarshi yangi sanksiyalar tayyorlayotgani ma’lum qilindi

Pxenyan raketalarni yaratish va sinovdan o‘tkazishda davom etayotgani sababli AQSH Shimoliy Koreyaga qarshi yangi sanksiyalar paketini ishlab chiqmoqda. Bu haqda AQSH milliy xavfsizlik bo‘yicha maslahatchisi Jeyk Sallivan Janubiy Koreyada o‘tkazilgan konferensiyadagi onlayn nutqi chog‘ida ma’lum qildi.

“Hozircha bizda sanksiya choralarining yangi paketi borligini ayta olamiz”, — dedi Sallivan. U KXDR tomonidan amalga oshirilgan raketa uchirishlari fonida AQSH, Yaponiya va Janubiy Koreya harbiy va xavfsizlik sohasida uch tomonlama hamkorlikni kuchaytirishga qaror qilganini ta’kidladi.

Sallivanning so‘zlariga ko‘ra, chora-tadbirlar qo‘shma harbiy mashg‘ulotlar va “AQSH strategik imkoniyatlarining mintaqaviy mavjudligi yanada sezilishini” o‘z ichiga oladi.

“Shu bilan birga, Vashington Shimoliy Koreya bilan muloqotga tayyor va hech qanday shartlarsiz muzokaralarga ochiq”, — dedi AQSH prezidenti maslahatchisi.

AQSH va Janubiy Koreya Shimoliy Koreyaning ballistik raketa uchirishiga javoban qo‘shma mashg‘ulotlar o‘tkazmoqda. Oxirgi marta mashg‘ulotlar 18-noyabr kuni F-35A qiruvchi samolyotlari ishtirokida o‘tkazilgan. Mashg‘ulotlar doirasida qiruvchilar GBU-12 lazerli boshqariladigan bombalar bilan Shimoliy Koreya raketa obyektlariga hujumni mashq qilgan, deb yozadi Yonhap.