“O‘limni oqlamaydigan harakatlar”: Shimoliy Koreyada kimlar sudsiz qatl qilinadi?

Shimoliy Koreyada odamlar giyohvand moddalar, Janubiy Koreya ommaviy axborot vositalarini tarqatish va diniy faoliyat uchun qatl qilinadi. Bu haqda Reuters xabar berdi.

Koreyalararo masalalarni hal qiluvchi Janubiy Koreyaning Birlashish vazirligi 2017-2022-yillar davomida vatanini tashlab ketgan 500 dan ortiq Shimoliy Koreya fuqarosidan to‘plangan guvohliklarga asoslangan 450 sahifalik hisobotni e’lon qildi.

“Shimoliy Koreya fuqarolarining yashash huquqi jiddiy tahdid ostida. Qatlni oqlamaydigan harakatlar, jumladan, giyohvand moddalar bilan bog‘liq jinoyatlar, Janubiy Koreya videolarini tarqatish, diniy va xurofotga asoslangan harakatlar uchun qatl jazosi keng qo‘llaniladi”, — deyiladi vazirlik hisobotida.

Hisobotda jamiyatlarda, harbiy asirlar lagerlarida va boshqa joylarda huquqlarning buzilishi, jumladan, ommaviy qatllar, qiynoqlar va o‘zboshimchalik bilan hibsga olish holatlari batafsil bayon etilgan.

Vazirlikning ta’kidlashicha, qamoqxonalarda o‘lim va qiynoqlar muntazam bo‘lib turadi va ba’zi odamlar chegaradan o‘tmoqchi bo‘lganida qo‘lga olinib, qatl etilgan.

34 mingga yaqin shimoliy koreyalik Janubiy Koreyada qo‘nim topgan, biroq chegara qo‘riqlash kuchaytirilgani sababli qochoqlar soni keskin kamaygan. Shimoliy Koreyadan kelganlar soni 2021-yilda COVID-19 yopilishi sharoitida 63 nafarni tashkil qilgan bo‘lsa, 2022-yil bu ko‘rsatkich 67 nafarni tashkil qilgan.

Janubiy Koreya prezidenti Yun Suk Yol hisobot xalqaro hamjamiyatni Shimoliy Koreyaning dahshatli qonunbuzarliklari haqida yaxshiroq xabardor qilishi kerakligini aytdi va KXDR yadroviy ambitsiyalarini davom ettirar ekan, iqtisodiy yordamning ”bir tiyiniga ham loyiq emas”ligini ta’kidladi.