Shimoliy Koreya yangi avlod strategik qanotli raketalarining ilk sinovini o‘tkazdi. Bu haqda Deutsche Welle xabar berdi.
Koreya markaziy axborot agentligi “Pulxvasal-3-31” raketasi hali ishlab chiqish bosqichida ekanini ma’lum qilib, parvoz qo‘shni davlatlar uchun xavf tug‘dirmaganini ma’lum qildi. “Strategik” deganda odatda yadroviy tahdid nazarda tutuvchi qurol tushuniladi.
“Sinov qurol tizimini doimiy yangilash jarayoni bo‘lib, u muntazam va majburiy tadbirlarning bir qismidir”, — deyiladi xabarda.
Mazkur xabar Janubiy Koreya harbiylari Shimoliy Koreya g‘arbiy qirg‘oqlari yaqinidagi suvlarga bir nechta qanotli raketalarni uchirganini aniqlaganidan bir kun o‘tib eʼlon qilindi. Janubiy Koreya mudofaa vaziri Sin Von Sik raketa uchirilishini qoralab, ularni mamlakat uchun jiddiy tahdid deb atadi.
14-yanvar kuni Pxenyan qattiq yonilg‘ida ishlaydigan o‘rta masofaga mo‘ljallangan birinchi ballistik raketasini sinovdan o‘tkazdi.
Shimoliy Koreyaning qanotli raketalarining faoliyati BMTning sanksiyalari bilan bevosita taqiqlanmagan. Qanotli raketalar odatda reaktiv quvvatga ega va ballistik raketalarga qaraganda pastroq balandlikda uchadi, bu ularni aniqlash va ushlab qolishni qiyinlashtiradi.
Koreya yarimorolida keskinlik kuchaymoqda
Yanvar oyi boshida Shimoliy Koreya Janubiy Koreya orollari tomon 200 tadan ortiq snaryad otgandi. Bunga javoban Janubiy Koreya Qurolli kuchlari o‘q otish mashqlarini o‘tkazdi.
O‘tgan yil dekabr oyida Pxenyan bir necha sinovlardan so‘ng, Shimoliy Koreya tomoniga ko‘ra, parvoz masofasi 1002,3 kilometrni tashkil etgan qit’alararo raketani uchirdi. Noyabr oyida KXDR koinotga o‘zining birinchi harbiy razvedka sun’iy yo‘ldoshini yubordi.
Izoh (0)