Prezident Shavkat Mirziyoyev rahbarligida 21-fevral kuni Xavfsizlik kengashi yig‘ilishi bo‘lib o‘tdi.
Unda mamlakat mudofaa qobiliyatini mustahkamlash, yangi tahdidlarga qarshi kurashish va harbiy tizimni rivojlantirish masalalari muhokama qilindi.
Yig‘ilishda milliy armiyaning zamonaviy qurol-yarog‘ va texnika bilan taʼminlanishi, harbiy xizmatchilarning tayyorgarligi oshgani qayd etildi. Yangi jangovar bo‘linmalar tashkil etilib, qo‘shinlar tarkibi qayta ko‘rib chiqilgani taʼkidlandi.
Prezident sunʼiy intellekt, dronlarga qarshi himoya vositalari va robotlashtirilgan texnologiyalarni joriy etish muhimligini taʼkidladi. Shuningdek, harbiy taʼlimda yangi yondashuvlar, xususan, dual taʼlimni joriy qilish masalasi ko‘rib chiqildi.
Harbiy xizmatchilar va ularning oilalarini ijtimoiy himoya qilish, yoshlarni vatanparvarlik ruhida tarbiyalashga eʼtibor kuchaytirilishi belgilandi.
Davlat rahbari mudofaa sanoati bilan tanishuvlar chog‘ida zamonaviy harbiy texnologiyalarning ahamiyatiga alohida eʼtibor qaratdi. Hozirgi kunda mintaqaviy mojarolarda sunʼiy intellekt, robotlar, raketalar, dronlar va ularga qarshi mudofaa vositalari keng qo‘llanmoqda.
Shundan kelib chiqib, O‘zbekiston qo‘shinlarida:
- Dronlar va ularga qarshi kurashish bo‘yicha maxsus bo‘linmalar,
- Sunʼiy intellekt bilan ishlaydigan kibertuzilmalar,
- Robotlashgan texnikalar,
- Havo hujumidan mudofaa tizimlarini rivojlantirish zarurligi taʼkidlandi.
Yig‘ilishda mudofaa tizimini rivojlantirish bo‘yicha aniq vazifalar belgilab olindi.
Izoh (0)