Prezident Shavkat Mirziyoyev Kamco Invest kompaniyasi rahbari Abdulloh al-Sharix bilan uchrashdi.
1998-yilda tashkil etilgan Kamco Invest moliyaviy kompaniyasi aktivlarni boshqarish, investitsion banking va brokerlik sohasida xizmatlar ko‘rsatadi. BAA, Saudiya Arabistoni, Iordaniya va Buyuk Britaniyada vakolatxonalari mavjud.
Kamco Invest rahbariyati bilan xususiy kompaniyalarning korporativ faoliyati samaradorligini oshirish loyihasini amalga oshirish hamda Qo‘shma investitsiya platformasini yaratish bo‘yicha kelishuvga erishildi.
O‘zbekiston prezidenti Al Imtiaz Investment Group kompaniyasi boshqaruvi aʼzosi va ijrochi direktori Fuzi Xolid bin Essa bilan uchrashuv o‘tkazdi.
Al Imtiaz Investment Group guruhi 2005-yilda tashkil etilgan bo‘lib, aktivlarni boshqarish, ko‘chmas mulk, sog‘liqni saqlash, sanoat va moliya sohalariga sarmoya kiritishga ixtisoslashgan.
Kuvayt kompaniyasining oziq-ovqat yetishtirish, farmatsevtika mahsulotlarini ishlab chiqarishni tashkil etish, shuningdek, ko‘chmas mulk obyektlarini qurish bo‘yicha tashabbusi qo‘llab-quvvatlandi.
O‘zbekiston yetakchisi Kuwait Investment Company kompaniyasi bosh ijrochi direktori Favoz al-Ahmadni qabul qildi.
Asosiy aksiyadori Kuvayt investitsiya agentligi bo‘lgan kompaniya 1961-yilda tashkil etilgan. Aktivlarni boshqarish, investitsion banking, xususiy biznes loyihalarini qo‘llab-quvvatlash bilan shug‘ullanadi.
Taʼlim, infratuzilma, agrosanoat, sunʼiy intellekt texnologiyalarini joriy qilish sohalarida qo‘shma loyihalarni amalga oshirish qo‘llab-quvvatlandi.
Shavkat Mirziyoyev Gulf Care General Trading kompaniyasi rahbari doktor Iyad as-Solihni qabul qildi.
2001-yilda tashkil etilgan kompaniya Ko‘rfaz mintaqasida tibbiy uskunalarning eng yirik yetkazib beruvchilaridan biri bo‘lib, Kuvaytdagi xususiy tibbiyot muassasalarining keng tarmog‘i egasidir.
Mamlakat yetakchisi kasalliklarni barvaqt aniqlash sohasidagi sheriklik rivojlanib borayotganini mamnuniyat bilan qayd etdi. Kompaniyaning O‘zbekiston hududlarida tibbiy xizmat ko‘rsatish va farmatsevtika mahsulotlarini ishlab chiqarish loyihalarini amalga oshirish borasidagi rejalari qo‘llab-quvvatlandi.
Izoh (0)