Prezidentning “Ikkinchi jahon urushida qozonilgan g‘alabaning 80 yilligi hamda Xotira va qadrlash kuniga tayyorgarlik ko‘rish va munosib nishonlash to‘g‘risida”gi qarori qabul qilindi. Bu haqda Prezident matbuot xizmati xabar berdi.
O‘zbekistonda 9-may – Xotira va qadrlash kuni “Vatan ravnaqi, tinchligi va himoyasi yo‘lidagi qahramonlik unutilmaydi” shiori ostida o‘tkaziladi.
Yolg‘iz va kam taʼminlangan Ikkinchi jahon urushi qatnashchilarining yashash joylari taʼmirlanadi, obodonlashtirish bo‘yicha tegishli chora-tadbirlar amalga oshiriladi.
Ikkinchi jahon urushining har bir qatnashchisi va uning oqibatida nogiron bo‘lgan shaxslar, front orti mehnat faxriylari, mustaqillik yillarida xizmat burchini bajarish chog‘ida halok bo‘lgan yoki nogiron bo‘lib qolgan harbiy xizmatchilar va huquqni muhofaza qiluvchi organlar xodimlari hamda ularning oila aʼzolariga moddiy va maʼnaviy yordam ko‘rsatiladi.
Ikkinchi jahon urushi qatnashchilari va uning oqibatida nogiron bo‘lgan shaxslarga, front orti mehnat faxriylariga “Ikkinchi jahon urushidagi g‘alabaning 80 yilligi” yubiley medallari tantanali ravishda topshiriladi.
Ikkinchi jahon urushi qatnashchilari va uning oqibatida nogiron bo‘lgan shaxslarning har biriga tibbiy xizmat ko‘rsatish hamda ularni parvarish qilish maqsadida tibbiyot mutaxassislarini belgilangan tartibda shartnoma asosida biriktirgan holda doimiy ravishda patronaj xizmati yo‘lga qo‘yiladi.
Ikkinchi jahon urushi qatnashchilari va front orti mehnat faxriylariga ularning xohishlariga ko‘ra respublika hududidagi sanatoriylarga bir nafar kuzatuvchisi bilan bir martalik bepul yo‘llanmalar taqdim etiladi.
“Yangi O‘zbekiston” bog‘ida 9-may kuni soat 21:00 da Xotira va qadrlash kuniga bag‘ishlangan bayram salyuti va mushakbozligi tashkil qilinadi.
Avvalroq Ikkinchi jahon urushi qatnashchilari va nogironlarining har biriga 10 ming dollar pul mukofoti berilishi haqida xabar berilgandi.
Izoh (0)