Shavkat Mirziyoyevning Kuvaytga ilk rasmiy tashrifi yakunlandi, deb xabar bermoqda Prezident matbuot xizmati.
Tashrif tadbirlari yakunlangach, Al-Kuvayt xalqaro aeroportida davlatimiz rahbarini Valiahd Shayx Saboh as-Saboh va boshqa rasmiy shaxslar kuzatib qo‘ydi. Davlat rahbari Toshkent shahriga jo‘nab ketdi.
-judG4t-Y.jpg)
Kuvaytga rasmiy tashrifning birinchi kuni
Shavkat Mirziyoyev Kuvayt amiri Mish’al as-Sabohning taklifiga binoan 17-fevral kuni rasmiy tashrif bilan ushbu mamlakatga yetib bordi. Al-Kuvayt xalqaro aeroportida davlat rahbarini Amir Shayx Mish’al as-Saboh, Valiahd Shayx Saboh Xolid al-Hamad as-Saboh va boshqa rasmiy shaxslar kutib oldi.
“Al-Bayan” saroyida Shavkat Mirziyoyev va Kuvayt amiri Shayx Mish’al as-Saboh tor doirada uchrashuv hamda rasmiy delegatsiyalar a’zolari ishtirokida muzokara o‘tkazdi. Muzokaralar yakunida O‘zbekiston prezidenti va Kuvayt amiri O‘zbekiston—Kuvayt keng qamrovli sheriklik munosabatlarini rivojlantirish to‘g‘risida qo‘shma bayonot qabul qildi. Qator hukumatlararo va idoralararo hujjatlar imzolandi.
“Al-Bayan” saroyidagi muzokaralar yakunlangach, Shavkat Mirziyoyev sharafiga Kuvaytdagi diplomatik missiyalar rahbarlari ishtirokida tantanali qabul marosimi uyushtirildi.
Tashrif davomida Shavkat Mirziyoyev Kuvayt bosh vaziri vazifasini bajaruvchi, ichki ishlar vaziri Shayx Fahd as-Saboh boshchiligidagi delegatsiyani qabul qildi, Kuvayt tashqi ishlar vaziri Abdulla al-Yahyo bilan uchrashuv o‘tkazdi. Shuningdek, qator kompaniyalar rahbarlari bilan uchrashuvlar o‘tkazdi.
Davlat rahbari madaniy dastur doirasida “As-Salom” saroy-muzeyining Kuvayt xalqi madaniyati va tarixini aks ettiruvchi ekspozitsiyalarini ko‘zdan kechirdi.
Tashrifning ikkinchi kuni
O‘zbekiston prezidenti Kuvayt valiahdi Shayx Saboh as-Saboh bilan uchrashuv o‘tkazdi. Uchrashuv davomida O‘zbekiston bilan Kuvayt o‘rtasidagi do‘stlik va keng qamrovli sheriklik munosabatlarini yanada rivojlantirish va mustahkamlash masalalari ko‘rib chiqildi.
Kuni kecha bo‘lib o‘tgan oliy darajadagi tarixiy muzokaralar, hukumat a’zolari va yetakchi kompaniyalar bilan sermahsul uchrashuvlar ko‘p qirrali O‘zbekiston—Kuvayt munosabatlarini kengaytirish uchun mustahkam asos bo‘lishi ta’kidlandi.
Oliy va yuqori darajada yaqin muloqot va almashinuvlarni davom ettirishga kelishib olindi. Investitsiyalarni jalb qilish uchun platformani tez fursatda ishga tushirish, agrosanoat majmui, transport va logistika, sog‘liqni saqlash, ta’lim, farmatsevtika, infratuzilma va boshqa yo‘nalishlarda kooperatsiya loyihalarini amalga oshirishga kelishib olindi.
Qabul qilingan barcha qaror va kelishuvlar ijrosi ustidan birgalikda nazorat o‘rnatish masalasi kelishib olindi.
O‘zbekiston—Kuvayt munosabatlari
Kuvayt O‘zbekiston mustaqilligini 1991-yil 30-dekabrda tan olgan. Ikki davlat o‘rtasida diplomatik munosabatlar 1994-yil iyulda o‘rnatilgan. Kuvayt elchixonasi Toshkentda 2001-yilda, O‘zbekistonning Al-Kuvaytdagi elchixonasi esa 2004-yilda ochilgan.
Ikki mamlakat xalqaro tashkilotlar va moliyaviy institutlar, jumladan, BMT va IHT doirasida yaqindan hamkorlik qilmoqda. Ikki davlat Tashqi ishlar vazirliklari o‘rtasida siyosiy maslahatlashuvlarning ikkita davrasi o‘tkazilgan.
2004-yil 19-yanvarda imzolangan savdo, iqtisodiy, ilmiy va texnik hamkorlikka oid bitimga asosan savdo-iqtisodiy hamkorlik bo‘yicha qo‘shma hukumatlararo komissiyasi tuzilgan. Uning hamraislari etib ikki davlat moliya vazirlari tayinlangan.
2024-yil 16—21-oktyabr kunlari Toshkent shahri, Farg‘ona va Sirdaryo viloyatlarida O‘zbekiston—Kuvayt biznes-forumlari o‘tkazilgandi. O‘sha yilning may va avgust oylarida Kuvaytda biznes forumlar va Made in Uzbekistan ko‘rgazmalari o‘tkazildi.
Shavkat Mirziyoyevning Kuvaytga rasmiy tashrifi arafasida 15-fevral kuni ushbu mamlakat poytaxtida O‘zbekiston—Kuvayt biznes-forumi bo‘lib o‘tdi. Unda qisqa vaqt ichida ikki davlat aloqalarini sezilarli darajada kengaytirish va tovar ayirboshlash hajmini oshirish imkonini beradigan yangi investitsiyaviy bitimlar va savdo shartnomalari imzolandi.
Izoh (0)