Daniya harbiy razvedka xizmati (DDIS) yaqin 5 yil ichida Yevropada “keng ko‘lamli urush” xavfi haqida ogohlantiruvchi hisobot tayyorladi. Bu haqda Politico xabar berdi.
Razvedka prognoziga ko‘ra, Rossiya NATOni ham harbiy, ham siyosiy jihatdan zaif deb hisoblab, alyansning bir yoki bir nechta davlatiga qarshi kuch ishlatishi mumkin. Bunda AQSHning roliga alohida e’tibor qaratilgan.
“Agar Rossiya AQSH hujum sodir bo‘lgan taqdirda Yevropa ittifoqchilarini qo‘llab-quvvatlay olmaydi yoki xohlamaydi degan xulosaga kelsa, harbiy mojaro ehtimoli ortadi”, deyiladi hisobotda.
Shuningdek, Moskva NATO bilan ehtimoliy qarama-qarshilikka tayyorgarlik ko‘rish uchun faol ravishda harbiy salohiyatini oshirayotgani ta’kidlangan. Hujjatda mojaro to‘xtatilsa yoki muzlatilsa, voqealar rivojining uchta ehtimoliy ssenariysi ko‘rib chiqiladi. Barcha variantlar Rossiya bir vaqtning o‘zida bir nechta davlatlarga qarshi urush olib borishga qodir emasligini ko‘rsatadi.
Rossiya tomonidan haqiqiy harbiy tahdid Ukrainadagi urushning rivojlanishiga ham bog‘liq, deb hisoblaydi Daniya razvedkasi.
Hujum bo‘yicha uchta ssenariy
Hisobot mualliflari hujum ssenariysini quyidagicha baholanmoqda:
- Ukrainadagi urush tugagandan so‘ng, Rossiya nomi oshkor etilmagan “qo‘shni davlat” bilan mahalliy qurolli to‘qnashuvni boshlashi mumkin.
- Taxminan 2 yildan so‘ng NATOning bir yoki bir nechta davlatlari uchun haqiqiy tahdid tug‘diradi va shu tariqa Boltiqbo’yi mamlakatlarining bir nechtasiga qarshi urushga tayyor bo‘ladi;
- Rossiya 5 yildan keyin esa AQSHning ishtirokisiz Yevropa qit’asida keng ko‘lamli urush olib borishga qodir bo‘lishi mumkin”.
Hisobotda NATO mamlakatlarining mudofaa salohiyati kuchayishi mumkinligi inobatga olinmagan.
AQSH NATOning harbiy xarajatlarini oshirishga chaqirmoqda
Donald Tramp NATO davlatlarining harbiy xarajatlarini yalpi ichki mahsulotning (YIM) 5 foizigacha oshirishni talab qilmoqda. Hozirda erishilgan kelishuvlarga ko‘ra, blokga a’zo davlatlar mudofaa uchun YIMning kamida 2 foizini ajratishi kerak, ammo 2024-yil oxirida bu talabni alyansning 32 davlatidan atigi 23 tasi bajargan.
Tramp o‘zining birinchi prezidentlik muddati davomida agar Yevropa davlatlari mudofaa xarajatlarini oshirmasa, AQSHning NATOdan chiqishi bilan bir necha bor tahdid qilgan. 2024-yilgi saylovlardagi g‘alabadan so‘ng u Vashingtonning alyansdan chiqish imkoniyatini yana bir bor tan oldi. Biroq agar yevropalik hamkorlar “hisoblarni to‘lashni” boshlasa, buning oldini olish mumkinligini ta’kidladi.
Yanvar oyida Reuters agentligi manbalarga tayanib, NATO davlatlari mudofaa xarajatlarini oshirish zarurligiga rozi ekani, biroq YIMning 5 foizi miqdoridagi ko‘rsatkichni ortiqcha deb hisoblashini ma’lum qilgandi.
Muqobil variant sifatida xarajatlarning minimal darajasini YIMning 3 foizigacha oshirish varianti ko‘rilgan.
“Biroq hatto bunday qadam ham alyansning ko‘plab a’zolari uchun jiddiy sinov bo‘ladi, ular hozirgi 2 foizlik chegara darajasiga yetishga qiynalmoqda”, deyiladi xabarda.
Bu boradagi yakuniy qaror NATOning iyun oyida Gaagada bo‘lib o‘tadigan sammitida qabul qilinishi kerak.
Izoh (0)