Sirdaryo viloyatida Qizil kitobga kiritilgan burgut noqonuniy tarzda saqlab kelinayotgani aniqlandi. Bu haqda Ekologiya vazirligi xabar berdi.
Unda aytilishicha, Sirdaryo viloyati Ekologiya, atrof-muhitni muhofaza qilish va iqlim o‘zgarishi boshqarmasi hamda tuman Ichki ishlar bo‘limi tomonidan kelib tushgan murojaat asosida o‘rganish o‘tkazildi.
O‘rganish davomida Boyovut tumanida fuqaro Y.A. tomonidan yirtqich qush — O‘zbekiston Qizil kitobiga kiritilgan burgut noqonuniy saqlab kelinayotgani aniqlangan.
Mazkur holat yuzasidan fuqaroga nisbatan Ma’muriy javobgarlik to‘g‘risidagi kodeksning 92-moddasi bo‘yicha ma’muriy bayonnoma rasmiylashtirilib, unga BHMning 5 baravari — 1 million 875 ming so‘m miqdorida jarima belgilandi.
Qayd etilishicha, burgut tibbiy ko‘rikdan o‘tkazilganidan so‘ng tabiat bag‘riga qo‘yib yuboriladi.
Ma’lumot uchun, burgut zaif, tabiiy jihatdan kam uchraydigan, doimiy yashovchi va mahalliy tarqalgan qushlar turiga kiradi. U har doim kam sonli bo‘lgan. Hozirgi vaqtda O‘zbekistonda taxminan 200 juft burgut yashaydi.
Bundan avval Xorazm viloyatining Urganch shahrida noqonuniy saqlanayotgan sher hayvonot bog‘iga topshirilgan edi. Shuningdek, Toshkent shahar Olmazor tumanida fuqaro o‘z uyida Qizil kitobga kiritilgan qushlarni saqlab kelayotgani aniqlangandi.
Izoh (0)