Shavkat Mirziyoyev Qozog‘istonning oliy davlat mukofoti bilan taqdirlandi

Shavkat Mirziyoyev Qozog‘istonning “Oltin qiron” (“Oltin burgut”) ordeni bilan taqdirlandi. Bu haqda Prezident matbuot xizmati xabar berdi.

Ma’lum qilinishicha, bu Qozog‘istonning oliy davlat mukofoti bo‘lib, O‘zbekiston yetakchisiga prezident Qosim-Jo‘mart To‘qayev tantanali ravishda topshirdi.

Shavkat Mirziyoyev ko‘p millatli O‘zbekiston xalqi nomidan minnatdorlik bildirib, bunday yuksak mukofot ikki xalqning ko‘p asrlik chinakam do‘stlik va yaxshi qo‘shnichilik rishtalarini mustahkamlash borasidagi birgalikdagi sa’y-harakatlariga berilgan baho, shuningdek, O‘zbekiston va Qozog‘iston munosabatlarini yangi tarixiy bosqich — strategik sheriklik va ittifoqchilik darajasiga olib chiqish borasidagi mushtarak intilishlarning e’tirofi ekanini ta’kidladi.

“Oltin qiron” oliy ordeni bilan davlat arboblari Qozog‘iston bilan do‘stona munosabatlarni mustahkamlashga qo‘shgan ulkan hissasi uchun taqdirlanadi.