Сирдарё вилоятида Қизил китобга киритилган бургут ноқонуний тарзда сақлаб келинаётгани аниқланди. Бу ҳақда Экология вазирлиги хабар берди.
Унда айтилишича, Сирдарё вилояти Экология, атроф-муҳитни муҳофаза қилиш ва иқлим ўзгариши бошқармаси ҳамда туман Ички ишлар бўлими томонидан келиб тушган мурожаат асосида ўрганиш ўтказилди.
Ўрганиш давомида Боёвут туманида фуқаро Й.А. томонидан йиртқич қуш — Ўзбекистон Қизил китобига киритилган бургут ноқонуний сақлаб келинаётгани аниқланган.
Мазкур ҳолат юзасидан фуқарога нисбатан Маъмурий жавобгарлик тўғрисидаги кодекснинг 92-моддаси бўйича маъмурий баённома расмийлаштирилиб, унга БҲМнинг 5 баравари — 1 миллион 875 минг сўм миқдорида жарима белгиланди.
Қайд этилишича, бургут тиббий кўрикдан ўтказилганидан сўнг табиат бағрига қўйиб юборилади.
Маълумот учун, бургут заиф, табиий жиҳатдан кам учрайдиган, доимий яшовчи ва маҳаллий тарқалган қушлар турига киради. У ҳар доим кам сонли бўлган. Ҳозирги вақтда Ўзбекистонда тахминан 200 жуфт бургут яшайди.
Бундан аввал Хоразм вилоятининг Урганч шаҳрида ноқонуний сақланаётган шер ҳайвонот боғига топширилган эди. Шунингдек, Тошкент шаҳар Олмазор туманида фуқаро ўз уйида Қизил китобга киритилган қушларни сақлаб келаётгани аниқланганди.
Изоҳ (0)